Holtastaðakirkja fær 1,8 milljón króna styrk og Sveinsstaðaskóli 3 milljónir í styrk úr viðbótarúthlutun húsafriðunarsjóðs. Á vef Minjastofnunar segir að þáttur í aðgerðum ríkisstjórnarinnar til að vinna gegn samdrætti vegna kórónuveirufaraldursins hafi verið að veita 100 milljón króna viðbótarframlagi í húsafriðunarsjóð, sem nýta eigi til að veita styrki í atvinnuskapandi verkefni á svæðum sem verða fyrir hvað mestum efnahagslegum þrengingum vegna faraldursins. Fyrr á árinu úthlutaði sjóðurinn 304 milljónum til 228 verkefna.

Í ljósi aðstæðna í samfélaginu hafi ekki þótt raunhæft að opna fyrir umsóknir um ný verkefni, heldur ákveðið að líta til verkefna sem sótt var um styrki til á síðasta umsóknartímabili. Þeim var gefin einkunn með tilliti til eflingar atvinnulífs, samfélagslegt mikilvægi og gilda frá sjónarhóli minjavörslu.

Minjastofnun ákvað í samráði við húsafriðunarnefnd að veita styrki til 36 verkefna og er Holtastaðakirkja í Blönduósbæ og Sveinsstaðaskóli í Húnavatnshreppi þar á meðal eins og áður sagði. Holtastaðakirkja fékk fyrr á þessu ári úthlutað 4,3 milljónum í styrk úr sjóðnum í flokknum friðlýstar kirkjur.

Sjá nánar um viðbótarúthlutun styrkja húsfriðunarsjóðs hér.

Tengd frétt:

Húsfriðunarsjóður úthlutar styrkjum