Hið árlega Héraðsmót Ungmennasambands Austur-Húnvatnssýslu, USAH fór fram þriðjudagana 7. júlí og 14. júlí. Fjöldi þátttakenda kom víða úr sýslunni en félögin sem sendu keppendur til leiks voru Umf. Bólstaðarhlíðarhrepps, Umf. Fram, Umf. Geislar og Umf. Hvöt. Keppt var í ýmsum greinum s.s. 60m hlaupi, 100m hlaupi, kúluvarpi, spjótkasti, lang- og þrístökki og 4x100m boðhlaupum.

Sigurvegari í mótinu var lið Umf. Hvatar á Blönduósi með 601,5 stig, í öðru sæti varð Umf. Fram á Skagaströnd með 399,5 stig, í þriðja sæti varð Umf. Bólstaðarhlíðarhrepps með 271 stig og í fjórða sæti Umf. Geislar með 117 stig.

Samhliða Héraðsmótinu fór fram Minningarmót um Þorleif Arason, fyrrum slökkviliðsstjóra Brunavarna A-Hún. og frjálsíþróttakempu Hvatar, sem lést 11. nóvember 1991. Veitt voru verðlaun fyrir bestu afrek karla og kvenna í kastgreinum. Að þessu sinni voru það Steinunn Hulda Magnúsdóttir og Ólafur Sigfús Benediktsson sem hlutu þau verðlaun. Auk þess hlaut Steinunn Hulda farandbikar fyrir besta einstaka afrekið á mótinu í kastgreinum. Þau keppa bæði fyrir Umf. Hvöt.