Húnavökuhátíðin heldur áfram í dag en nokkur röskun hefur orðið á viðburðum vegna veðurs. Í dag átti að fara fram golfmót og Blönduhlaup, en svo verður ekki. Sögugangan um gamla bæinn sem fara átti fram í dag hefur verið færð til morguns klukkan 10:30. Knattspyrnuleikurinn milli Brunavarna A-Hún. og sveitarstjórnar Blönduósbæjar ásamt ungmennaráði verður haldinn á morgun á skólalóðinni klukkan 15:30. Eftir leikinn verður vítaspyrnukeppni sem allir geta tekið þátt í.

Fjörið sem átti að vera fyrir framan Félagsheimilið í dag klukkan 13:30-16:00 hefur verið fært inn í Íþróttamiðstöðina. Lalli töframaður kynnir og skemmtir, Slagarasveitin, Sirkus Íslands, Maggi mix og Páll Óskar mæta á svæðið og boðið verður upp á hoppukastala og andlitsmálningu fyrir börnin. Verðlaun verða veitt fyrir best skreytta húsið og flottustu og frumlegustu fígúrurnar, sem og til götunnar með flestar fígúrur. Vatnaboltar verða ekki í boði og engir hestar eins og til stóð vegna veðursins.

Á Blönduósvelli klukkan 17 í dag fer fram leikur í 4. deild Íslandsmótsins í knattspyrnu. Sameiginlegt lið Kormáks og Hvatar tekur á móti knattspyrnuliðinu Birninum. Frítt er á völlinn.

Klukkan 18 hefst sundlaugarpartý í tilefni af 10 ára afmæli sundlaugarinnar á Blönduósi. Maggi Mix þeytir skífur og skemmtir sundlaugargestum. Léttar veitingar og sápukúluvél í gangi.

Orgeltónleikar í Blönduóskirkju
Í dag heldur Lára Bryndís Eggertsdóttir orgeltónleikar í Blönduóskirkju klukkan 17-18. Á þeim má bæði heyra þjóðlagatengda tónlist, meðal annars hið magnaða tónaljóð Moldá (Vltava) eftir tékkneska tónskáldið Bedřich Smetana í umritun fyrir orgel, sem og alíslenska orgeltónlist eftir Vatnsdælinginn Báru Grímsdóttur. Lára Bryndís mun einnig kynna tónlistina og segja frá tilurð íslensku orgelverkanna. Aðgangur er ókeypis á tónleikana.

Páll Óskar slær svo botninn í dagskrá dagsins með stórdansleik í Félagsheimilinu klukkan 20-23.

Sjáðu alla Húnavökudagskrána hér.