Enginn er í einangrun vegna kórónuveirunnar á Norðurlandi vestra en einn er í sóttkví, samkvæmt nýjum upplýsingum á vefnum covid.is. Síðustu tvær vikur hefur einn verið skráður í einangrun og mest voru 15 í sóttkví. Á landinu öllu eru nú 116 í einangrun og 528 í sóttkví. Flestir eru á höfuðborgarsvæðinu eða 77 í einangrun og 376 í sóttkví. Staðfest kórónuveirusmit er í öllum landshlutum nema á Norðurlandi vestra.

Tvö ný kórónaveirusmit greindust innanlands hjá sýkla- og veirufræðideild Landspítalans í gær. Annar hinna smituðu var í sóttkví við greiningu. Níu ferðalangar sem skimaðir voru við landamærin reyndust vera með veirusmit og bíða allir niðurstöðu mótefnamælingar. Alls voru 158 sýni greind í gær á sýkla- og veirufræðideild Landspítalans og 2.001 sýni úr landamæraskimunum.