Þrektækjasalurinn í Íþróttamiðstöð Húnaþings vestra opnaði að nýju á föstudaginn en með breyttu sniði vegna hertra sóttvarnarreglna. Á vef Húnaþings vestra kemur fram að salurinn sé opinn í eina og hálfa klukkustund í senn svo er lokað í þrjátíu mínútur á milli vegna þrifa. Einungis fimm notendur mega vera í salnum í senn og skýrt er kveðið á um að gestir skuli halda tveggja metra millibili.

Notendur salarins verða sjálfir að þrífa og sótthreinsa öll tæki og búnað eftir hverja snertingu. Búningsklefar verða opnir svo framarlega sem heildarfjöldi sé innan leyfilegra marka. Mælt er með því að hringja og panta tíma fyrirfram í síma 451 2532 til að tryggja sér pláss.

„Nú er ráð að standa saman og fylgja þessum fyrirmælum. Pössum upp á metrana tvo. Verum dugleg og samviskusöm við bæði þrifin og sótthreinsun allra tækja og búnaðar svo hægt sé að halda þrektækjasalnum opnum,“ segir í tilkynningu á vef Húnaþings vestra en þar má sjá tímaplan fyrir þrektækjasalinn.