Blönduskóli var settur í dag og kennsla hefst hjá öllum bekkjum á morgun nema hjá 1. bekk. Höfðaskóli verður settur á mánudaginn og Húnavallaskóli á þriðjudaginn. Engin skólasetning verður í Grunnskóla Húnaþings vestra en kennsla hefst þar á mánudaginn. Nemendur byrja á því að hitta umsjónarkennara sinn í heimastofu í klukkustund og svo hefst kennsla samkvæmt stundaskrá.

Húnavallaskóli verður settur þriðjudaginn 25. ágúst klukkan 13:00. Að þessu sinn verður skólasetningin með aðeins öðru sniði en verið hefur og mælst er til þess að aðeins annað foreldrið mæti með barni/börnum. Skólastjóri fer yfir upphaf skólaársins og þær breytingar sem verða á starfsmannahópnum og skipulagi skólaársins. Að því loknu taka umsjónarkennarar á móti sínum nemendum í kennslustofum, afhenda stundaskrár og fara yfir fyrirkomulag kennslu. Kennsla hefst svo samkvæmt stundarskrá miðvikudaginn 26. ágúst.