Aðgerðastjórn almannavarna á Norðurlandi vestra hefur uppfært skráningu yfir þá sem eru í einangrun og sóttkví vegna kórónuveirufarsóttarinnar. Nú eru fimm í einangrun og 47 í sóttkví samanber meðfylgjandi töflu. Í ljósi staðfestra smita á Norðurlandi vestra vill aðgerðastjórnin ítreka fyrri tilmæli sín til almennings um að huga vel að eigin sóttvörnum og fylgja eftir þeim reglum og fyrirmælum sem sóttvarnaryfirvöld hafa gefið út.

Í tilkynningu frá aðgerðarstjórninni segir:

Hversu útbreidd umrædd smit eru mun væntanlega koma í ljós á næstu dögum og mun aðgerðastjórn uppýsa eftir bestu getu um stöðuna hverju sinni á hverju svæði fyrir sig en staðfest smit í landshlutanum eru fimm, þrjú í Skagafirði og tvö í Húnaþingi vestra.

Við berum ábyrgð á eigin smitvörnum og þar vill aðgerðastjórn sérstaklega minna á handþvott, sprittun, fjöldatakmarkanir og nálgunarregluna. Í fyrirtækjum og stofnunum þar sem ekki er hægt að viðhafa nálgunarregluna skal notast við grímur.

Aðgerðastjórn vill minna á fyrri tilmæli til íbúa að halda ferðalögum á milli landshluta í lágmarki og forðast ferðalög til höfuðborgarsvæðisins sem og til annarra svæða sem talin eru útsett fyrir smitum eins og kostur er. Mælst er til að öllum ferðum sem hægt sé að fresta,  sé frestað á meðan núverandi ástand varir.

Nú fer rjúpnaveiðitímabilið að hefjast og því má búast við að einhver fjöldi gesta hyggist sækja Norðurland vestra heim. Aðgerðastjórn lítur á að slíkar ferðir falli undir tilmælin hér að ofan og biðlar til rjúpnaveiðimanna um að verða við þeim.

Eina leiðin gegn veirunni er samstaða.

Á upplýsingafundi almannavarna í dag kom fram sóttvarnarlæknir er með minnisblað í vinnslu þar sem boðaðar verða enn hertari aðgerðir vegna kórónuveirufaraldursins. 

Núverandi aðgerðir gilda til 3. nóvember en sóttvarnarlæknir sagði á fundinum í dag að æskilegt væri að hertar aðgerðir hans tækju gildi fyrr og helst fyrir helgi. Að tveimur til þremur vikum liðnum væri hægt að slaka á aðgerðum ef vel gengi.