Á vef Blönduósbæjar er að finna skipulagsauglýsingu þar sem verið er að auglýsa tillögur að breytingum á aðalskipulagi Blönduósbæjar 2010-2030. Breytingarnar varða legu Þverárfjallsvegar norðaustur af Blönduósi, fjölgun efnistökusvæða á Sölvabakka, stækkun sorpförgunarsvæðis og rekstur brennsluofns í Stekkjarvík og legu reiðleiðar innan þéttbýlisins á Blönduósi.

Þá er auglýst tillaga að breytingum á deiliskipulaginu Stekkjarvík – Urðun og efnistaka, sem snýr að því að auka urðun á svæðinu sem og að bæta við brennsluofni og gassöfnunarblöðru sem þýðir stækkun svæðisins, breytta afmörkun og breytingar á texta í deiliskipulaginu.

Þeim sem telja sig eiga hagsmuna að gæta er hér með gefinn kostur á að gera athugasemdir til 17. desember næstkomandi. Skila þarf athugasemdum skriflega á skrifstofu Blönduósbæjar, Hnjúkabyggð 33, 540 Blönduósi eða með tölvupósti á netfangið blonduos@blonduos.is. Þeir sem ekki gera athugasemdir innan tilskilins frests, teljast samþykkir tillögunni, að því er segir á vef Blönduósbæjar og hér má finna nánari upplýsingar eins og greinargerðir og uppdrætti vegna tillagnanna.