Á bæjarstjórnarfundi Akureyrarbæjar 3. nóvember var rætt um mögulega styttingu þjóðvegar milli Akureyrar og Reykjavíkur. Í bókun fundarins er ríkisstjórn og Alþingi hvatt til að meta og taka afstöðu til hugmynda sem fram hafa komið um styttingu þjóðvegar 1 á milli Eyjafjarðar og Reykjavíkur. „Ljóst er að verulegur þjóðhagslegur ávinningur hlýst af styttingu leiðarinnar sem myndi bæta samkeppnishæfni svæðisins á atvinnu- og íbúamarkaði,“ segir í bókuninni.

Í henni segir jafnframt að stytting leiðarinnar muni auka umferðaröryggi og hafi jákvæð umhverfisáhrif og það hljóti að vera þjóðþrifamál að koma framkvæmdum sem þessum inn í samgönguáætlun.

Í umfjöllun í Fréttablaðinu í dag kemur fram að bæjarfulltrúarnir Gunnar Gíslason hjá Sjálfstæðisflokki og Andri Teitsson hjá L-lista hafi tekið saman þá möguleika sem nefndir hafa verið á undanförnum 20 árum, sem gætu stytt leiðina um allt að 80 kílómetra, en hún er nú 388 kílómetrar.

Tvær leiðir hafa oftast verið nefndar, í Húnavatnssýslum og Skagafirði, sem samkvæmt Vegagerðinni myndu stytta þjóðveginn samanlagt um 20 kílómetra. Þessar leiðir hafa þó mætt andspyrnu í viðkomandi sveitarfélögum, því þá yrði þjóðvegurinn færður út fyrir bæði Blönduós og Varmahlíð.

Gunnar segir í samtali við Fréttablaðið mikinn sparnað fólginn í styttingu vegarins, bæði í ferðakostnaði og flutningskostnaði. Árið 2003 hefði samgönguráðuneytið reiknað út 20 milljóna króna sparnað á hvern kílómetra, sem væri hægt að framreikna í meira en 40 milljónir í dag.

Á bilinu eitt til tvö þúsund bílar keyra á milli á hverjum degi. Vegagerðin sjálf væri vissulega kostnaðarsöm en myndi borga sig upp á fjórum árum samkvæmt skýrslu Rannsóknarmiðstöðvar Háskólans á Akureyri frá árinu 2008 fyrir Leið ehf.

Gunnar telur að vel sé hægt að finna leiðir til að koma til móts við þetta, hugsanlega með því að færa þjónustuna eða öðrum mótvægisaðgerðum. „Umferð um Blönduós mun ekki hverfa, þaðan er til dæmis mikil umferð til Skagafjarðar yfir Þverárfjall,“ segir hann.

Fjárhagsleg hagkvæmni er ekki einu áhrifin sem stytting myndi hafa að mati Gunnars. Styttri leið myndi þýða minni útblástur bíla og færri slys. Í áðurnefndri skýrslu HA kemur einmitt fram að áætlað sé að slysum muni fækka um ellefu á ári, verði farið í styttingar í Húnavatnssýslu og Skagafirði.

„Á stuttum vegarkafla norðan við Blönduós er oft mikill norðanstrengur, skyggni lítið og erfitt að keyra,“ segir Gunnar. Önnur hugmynd sem Akureyringar vilja láta kanna frekar er vegur um Stórasand, sem Halldór Blöndal, fyrrverandi samgönguráðherra, viðraði í kringum aldamót.

Þetta yrði hálendisvegur sem myndi stytta þjóðveginn um 80 kílómetra. Hinar styttingarnar kæmu þá ekki til þar sem farið væri fram hjá þeim. Þessi hugmynd mætti einnig andstöðu, meðal annars frá Húnvetningum og Skagfirðingum.

„Með þessari leið yrði vegurinn vissulega kominn í töluverða hæð að hluta en það er ekki ósvipað og á veginum milli Akureyrar og Egilsstaða. Það hefur ekki verið stórt vandamál,“ segir Gunnar í samtali við Fréttablaðið.

Tengdar fréttir:

Skoðanakönnun um vegamál á Norðurlandi

577 undirskriftir söfnuðust fyrir Húnavallaleið

Húnavatnshreppur á móti áformum um Húnavallaleið

Vilja Húnavallaleið aftur á dagskrá

Leiðarmenn gefast ekki upp

Húnavallaleið í einkaframkvæmd?

Nefnd fer yfir vegi og skipulag

Húnavallaleið út af borðinu

Ákvörðunin sé heimamanna

Skipulagsvaldið er hjá sveitarfélögunum