Samkvæmt upplýsingum á vefsíðunni covid.is er enginn í einangrun eða sóttkví á öllu Norðurlandi og á Austfjörðum. Alls eru 143 í einangrun á landinu öllu og 239 í sóttkví. Flestir eru í einangrun á höfuðborgarsvæðinu eða 87 og þar eru 119 í sóttkví. Innanlandssmit í gær voru þrjú. Tuttugu og fimm eru á sjúkrahúsi og einn á gjörgæslu. Landið allt er á rauðu stigi sem þýðir alvarlegt ástand. Fólk er beðið um að halda sig sem mest til hlés og bíða með samkomur að svo stöddu.

Þá er fólk sérstaklega beðið að fara með gát þegar það ferðast á milli landshluta. Sjá nánar á www.covid.is.

Tímamót urðu í baráttunni gegn kórónuveirufaraldrinum í dag þegar vél með tíu þúsund skammta af bóluefni Pfizer og BioNTech lenti á Keflavíkurflugvelli um níu leytið í morgun. Fyrstu skammtarnir ættu að duga til að bólusetja fimm þúsund manns en búist er við að Ísland muni fá þrjú til fjögur þúsund skammta í hverri viku til loka mars á næsta ári. Byrjað verður að bólusetja á morgun.