Undanfarin ár hefur verið unnið að viðbótar vatnsöflun á Reykjum við Húnavelli fyrir hitaveitu Blönduóss og Skagastrandar. Í ár var lokið við að bora fjórðu vinnsluholuna, 1.200 metra djúpa, auk þess sem eldri borhola var endurfóðruð niður á 350 metra dýpi.

Við það tækifæri var skipt út hefðbundnum búnaði í holunni og í staðinn sett þekkt lausn úr olíuiðnaði þar sem mótor og dæla eru sambyggð á 300 metra dýpi. Með þessari lausn er hægt að fylgjast með ástandi holunar í rauntíma sem auðveldar og bætir eftirlit með auðlindinni.

Þetta er í fyrsta skipti sem RARIK nýtir þessa tækni en hún er algeng erlendis og hefur áður verið nýtt hérlendis. Í ár var borholuhús á Reykjum einnig endurnýjað og uppfært með nýjum búnaði og bættri hljóðvist. Öllum þessum aðgerðum er ætlað að auka rekstraröryggi hitaveitu Blönduóss og Skagastrandar til framtíðar.

Sagt er frá þessu á vef RARIK.