Kórónuveiran er að sækja aftur í sig veðrið hér á landi. Nú eru 57 í einangrun á landinu og 435 í sóttkví. Fólk er í sóttkví í öllum landshlutum fyrir utan Vestfirði. Á Norðurlandi vestra eru tveir í sóttkví en enginn í einangrun. Flest smit nú eru í aldurshópnum 18-29 og 30-39 ára. Um helgina hafði lögreglan á Norðurlandi vestra afskipti af tveim erlendum ferðamönnum sem áttu að vera í sóttkví.

Höfðu þeir við komuna til landsins farið í fyrri skimun  eins og reglur kveða á um og svo haldið til í sumarbústað í umdæminu. Höfðu þeir, þrátt fyrir að hafa kynnt sér allar reglur hvað varðar sóttkví, farið í ferðir út frá bústaðnum á bifreið og meðal annars farið á skíði, að því er segir í tilkynningu lögreglu. Hún tekur það fram að skíðaferðin hafi þó ekki verið á meðal almennings.

Það vakti athygli að ferðamennirnir áttu bókað flug til síns heimalands degi síðar en niðurstaða seinni skimunar átti að liggja fyrir. Mennirnir voru sektaðir og greiddu þeir 200.000 krónur til ríkissjóðs hvor um sig.