Sveitarstjórn Blönduósbæjar lýsir yfir miklum vonbrigðum með að Ferðamálastofa, sem er vörsluaðili Framkvæmdasjóðs ferðamannastaða, hafi nýverið synjað sveitarfélaginu um styrk vegna uppbyggingar ferðamannaaðstöðu við Hrútey. Verkefnið hlaut viðurkenningu og styrk úr sjóðnum árið 2018 vegna umsóknar 2017 og nam hann 32 milljónum króna. Síðan þá hefur öllum umsóknum um styrki verið hafnað. Sveitarfélagið ætlar að óska eftir rökstuðningi frá Ferðamálastofu fyrir ítrekuðum synjunum umsókna til verkefnisins.

Blönduósbær sótti fyrst um styrk úr Framkvæmdasjóði ferðamannastaða til Hrúteyjar verkefnisins haustið 2016 og var umsókninni hafnað. Árið eftir var aftur sótt um styrk og fékkst þá úthlutað 32 milljónir króna sem sjóðurinn kynnt í mars 2018. Styrkurinn var nýttur í fyrsta áfanga verkefnisins og sama ár var lokið við að bæta aðgengi og aðkomu að Hrútey og stígar og bílastæði malbikuð. Þá var lagt rafmagn og vatnslagnir að væntanlegu þjónustuhúsi við bílastæðin.

Sótt var um styrk til verkefnisins haustið 2018 en umsókninni var hafnað. Aftur var sótt um styrk haustið 2019 en umsókninni hafnað. Sama ár var send umsókn til Vegagerðarinnar vegna gömlu Blöndubrúarinnar sem nýst gæti sem ný göngubrú yfir í eyjuna og fékkst þá styrkur upp á 30 milljónir króna. Framkvæmdir árið 2019 lutu að frágangi við bílastæði og aðkomu og þökulagningu í kring. Árið 2020 var gamla brúin svo sandblásin og máluð. Þá var byrjað á vinnu við stólpa en ýmsar tafir í framkvæmdinni og erfið haustveður hafa tafið þá vinnu.

Síðastliðið haust var svo enn og aftur sótt um styrk til Framkvæmdasjóðs ferðamannastaða. Í umsókninni var lögð áhersla á að styrkurinn ætti að nýtast til byggingar þjónustuhúss og gerð salerna við bílastæðin við Hrútey. Í byrjun þessa mánaðar, þegar Ferðamálastofa tilkynnti um úthlutanir úr Framkvæmdasjóði ferðamannastaða, kom í ljós að umsókn Blönduósbæjar var enn og aftur hafnað.

Samkvæmt upplýsingum frá Blönduósbæ er gert ráð fyrir að vinnu verði lokið á þessu ári við brúarstólpa og að gamla Blöndubrúin verði flutt á nýjan stað með tilheyrandi frágangi. Stefnt er á verklok á þessum fyrsta áfanga verkefnisins í lok júní næstkomandi. Í framhaldinu er gert ráð fyrir byggingu þjónustuhúss með salernum við bílastæðin og verður það næsti áfangi verkefnisins þegar tekst að fjármagna hann. Þá er gert ráð fyrir að laga stíga og umhverfi í Hrútey á næstu árum.

Tveir styrkir í Húnaþing
Fyrr í þessum mánuði gerðu Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra og þingmaður Norðvesturkjördæmis, og Guðmundur Ingi Guðbrandsson, umhverfis- og auðlindaráðherra, grein fyrir úthlutun fjármuna til uppbyggingu innviða, náttúruverndar og annarra verkefna á ferðamannastöðum árið 2021. Samtals var úthlutað 764 milljónum króna úr Landsáætlun um uppbyggingu innviða og 807 milljónum úr Framkvæmdasjóði ferðamannastaða. Tvö verkefni í Húnavatnssýslum fengu styrk að þessu sinni, Hvítserkur 18 milljónir og Þrístapar 51,5 milljónir.