Kvenfélag Svínavatnshrepps hélt uppá 150 ára afmæli sitt 20. apríl sl. Var öllum kvenfélagskonum í Austur Húnavatnssýslu boðið í kaffi í Dalsmynni. Þar var mikil kökuveisla sem einkenndist af því að hafa kaffibrauð sem hugsanlega hefði getað verið á borðum er kvenfélagið var stofnað.

Fyrir tíu árum þegar kvenfélagið varð 140 ára héldu konur í félaginu hóf og einnig handverkssýningu í Dalsmynni. Það tókst mjög vel og var það félagskonum mikil ánægja að vera þarna staddar 10 árum seinna með félag sem ekki er síður öflugt en var þá.

Kvenfélag Svínavatnshrepps var stofnað að Sólheimum 25. nóvember 1874. Það voru 8 konur í Svínavatnshreppi sem stofnuðu það. Það er skemmtilegt til þess að hugsa að eftir öll þessi ár er frekar öflugt starf í félaginu.

Félagið hefur á hverju ári safnað peningum sem það hefur fengið með kaffisölu, dúkaleigu og ýmsu fleiru sem síðan er gefið til góðgerðarmála, hafa Hollvinasamtök Heilbrigðisstofnunarinnar á Blönduósi, Jólasjóður rauða krossins í A-Hún, Heimilisiðnaðarsafnið, skólar og leikskólar á svæðinu og fleiri notið góðs af. Einnig er félagið að greiða styrktarlínur ýmissa samtaka.

Það má einnig geta þess að kvenfélagskonur hafa tekið þátt í ýmsum námskeiðum, til dæmis í listmálun, mála á keramik og handverk ýmiskonar.

Framundan á vegum félagsins er heilmikil dagskrá. Félagið mun sjá um veitingar á ýmsum fundum, 1.maí kaffi fyrir stéttarfélagið Samstöðu, sölu á opnunarhátíð í Listakoti Dóru í júlí, og síðan vera með sölu í samstarfi við kvenfélag Bólstaðarhlíðarhrepps 17.júní á Blönduósi og sölu á Húnavöku en það samstarf byrjaði sl. sumar og hefur gengið mjög vel.

Afmæliboðið var hið ánægjulegasta og færðu hin 5 kvenfélögin á svæðinu Kvenfélagi Svínavatnshrepps að gjöf 50 þúsund krónur sem runnu til Heimilisiðnaðarsafnsins.