Á laugardaginn klukkan 14 verður opnuð myndlistarsýning í Hrútey og verður hún opin almenningi til 28. ágúst. Um er að ræða risastórt útilistaverk eftir listakonuna Hrafnhildi Arnardóttur eða Shoplifter eins og Hrafnhildur kallar sig. Í verkinu hyggst Shoplifter stilla náttúruperlunni Hrútey og gervináttúruverkum sínum upp sem hliðstæðum sem einnig má skoða sem andstæður, samstæður eða gagnstæðar spegilmyndir.

Hrafnhildur, sem búsett í New York, er í hópi fremstu samtímalistamanna þjóðarinnar og var fulltrúi Íslands á Feneyjatvíæringnum árið 2019 en innsetning hennar, Chromo Sapiens vakti mikla athygli og var talin meðal þess sem hæst bar á sýningunni. Viðbúið er að sýning listakonunnar í Hrútey muni vekja athygli langt út fyrir landssteinanna.

Sýningin í Hrútey ber heitið ,,Boðflenna" og er opin allan sólarhringinn fram til 28. ágúst eins og áður sagðu, og er aðgangur ókeypis. 

Myndlistarupplifun á heimsmælikvarða
Markmið myndlistasýningarinnar er að bjóða heimamönnum og ferðamönnum sem leið eiga um Norðurland vestra upp á frumlega og stórbrotna myndlistarupplifun á heimsmælikvarða. Sýningin mun jafnframt vekja áhorfendur til umhugsunar um samspil náttúru landsins og hinar mannlegu náttúru. Ennfremur er markmiðið að kynna náttúruparadísina Hrútey fyrir gestum svæðisins en fjöldi fólks veit ekki um tilvist hennar jafnvel þótt það eigi oft leið í gegnum Blönduós.

Verk Shoplifter, hvort sem um er að ræða skúlptúra, veggmyndir eða staðbundnar innsetningar, ýmist unnin úr gervihári eða náttúrulegu hári, fjalla um fyrirbæri á borð við hégóma, sjálfsmynd, tísku, fegurð og goðsagnir poppmenningarinnar. Í hennar huga er hárið hinn fullkomni þráður þar sem það vex af sjálfum líkamanum og sá efniviður til sköpunar sem næstur er upprunanum. Hárið er leið einstaklingsins til að skilgreina sjálfan sig og oft einnig miðill til listrænnar tjáningar. Húmorinn er mikilvægur þáttur í lífi hennar og verkum, oft er hann lúmskur en stundum tekur hann yfir.

Meðal nýjustu verkefna Shoplifters má nefna einkasýningar í Kulturhuset í Stokkhólmi, Kiasma - Þjóðar[1]listasafni Finna (2019), Listasafni Íslands (2017), Walt Disney Concert Hall í Los Angeles (2017) og Queensland Art Gallery of Modern Art í Ástralíu (2016). Meðal annarra eftirtektarverðra verkefna og viðurkenninga má nefna innsetningu í glugga MOMA, Museum of Modern Art in New York (2008) sem hún vann í samstarfi við art collective assume vivid astro focus (avaf), Norrænu textílverðlaunin og orðu prins Eugen sem sænski konungurinn veitir fyrir sérstakt afrek á sviði lista (2011). Hrafnhildur hefur lengi verið meðal helstu samstarfsmanna Bjarkar Guðmundsdóttur og hefur m.a. séð um útlit söngkonunnar og grafískt útlit nokkurra stórra verkefna hennar.

Hver er Shoplifter?
Hrafnhildur býr tímabundið á Íslandi en hluti af þeirri tímafreku vinnu sem gerð verkanna er, fer fram á vinnustofu hennar í Reykjavík. Við vinnuna er hráefnið, sem er ýmist nælonhár, plast eða annað gerfiefni, unnið með ýmiskonar hefðbundinni textíltækni s.s. flosi, rýja, þæfingu, hnútum, fléttum og saumaskap en efnið er líka í sumum tilvikum hitað, brennt, brætt, litað eða málað. Þegar ákjósanlegri  þykkt og áferð hefur verið náð eru búnar til voðir eða mottur, dúskar, kaðlar, bönd og annað sem nýtt  verður til að skapa hið endalega listaverk. Sá efniviður sem þannig er orðinn til verður fluttur norður á Blönduós þar sem honum verður umbreytt í þúfur, plöntur, skófir, blóm, runna, tré, steina, vörður, kletta o.s.frv. Verkunum verður dreift um Hrútey með ákveðnum áherslupunktum þannig að þegar gengið verður um eyna verða á vegi manns lundir, flatir eða lautir sem listin hefur yfirtekið og við blasa óvæntir og ónáttúrulegir gestir í annars mjög náttúrulegu umhverfi Hrúteyjar. Þannig skapar Hrafnhildur togstreitu milli þess raunverulega í landslaginu og þeirrar mjúku og lúmsku innrásar sem  verkin eru þegar þau gera tilraun til að villa á sér heimildir í ríki náttúrunnar.