Höskuldur Birkir Erlingsson hefur frá árinu 2002 haldið utan um rjúpnatalningu við Blönduós. Ávallt hefur verið talið um mánaðamótin apríl/maí og karrar eingöngu taldir. Samkvæmt nýjustu talningu er rjúpum að fjölga en 91 rjúpa var talin að þessu sinni og er það 25% fjölgun frá fyrra ári. Frá árinu 2021 er fjölgunin 168%. Svæðið sem talið var á afmarkast af Svínvetningabraut og niður með Laxá á Ásum, að þjóðvegi 1 og svo niður að Blönduósi.

Höskuldur segir frá þessu á facebooksíðu sinni. Þar kemur fram að talningin hafi verið framkvæmd af honum, Yuliia Sergeevna Kolomoiets, Þorsteini Hafþórssyni og Elínu Rós Bjarnadóttur.