Húnavaka, bæjarhátíð Blönduósinga, verður haldin í 18. sinn um helgina. Hátíðin hét áður Matur og menning og var fyrst haldin árið 2003. Árið 2006 var ákveðið að breyta nafninu og endurvekja hið góða og gilda nafn Húnavaka sem áratugum saman var fastur liður í menningarlíf Húnvetninga. Dagskrá Húnavöku er fjölbreytt að vanda og ættu allir að geta fundið eitthvað við sitt hæfi.

Á fimmtudaginn ætla Blönduósingar í þéttbýli og dreifbýli að drífa sig út og skreyta hús sín hátt og lágt með skemmtilegum og frumlegum fígúrum. Verðlaun verða veitt fyrir best skreytta húsið, frumlegustu og flottustu fígúruna og fyrir götuna með flestar fígúrurnar. Íbúar eru hvattir til að skella upp í götugrill þegar búið er að skreyta. Á fimmtudagskvöld verður Bjórbingó í Félagsheimilinu þar sem fjöldi spennandi vinninga er í boði. Aldurstakmark er 18 ár, aðgangseyrir 1.000 krónur og eitt spjald innifalið.

Á föstudaginn verður sirkusnámskeið með Sirkus unga fólksins á túninu fyrir framan Heimilisiðnaðarsafnið. Verslun SAH Afurða tekur á móti gestum að Húnabraut 39 þar sem kynning á vörum fyrirtækisins fer fram og Húnavökutilboð verða í boði á grillkjöti og grillpylsum. Útitónleikar verða haldnir hjá Heilbrigðisstofnun Norðurlands á Blönduósi þar sem Eyjólfur Kristjánsson mun troða upp. Leikhópurinn Lotta verður á Þríhyrnunni með skemmtileg atriði unnin upp úr Litlu gulu hænunni og er frítt fyrir alla í boði Blönduósbæjar. Afmælishátíð verður í sveitaversluninni á Hólabaki en 10 ár eru síðan fyrstu vörur fyrirtækisins fóru á markað. Boðið verður upp á tertu og pylsur og Eyþór Ingi lítur við og spilar nokkur lög. Afsláttur verður af völdum vörum. Tónleikar verða á skólalóð Blönduskóla á föstudaginn í boði fyrirtækja. Þar koma fram Sveppi og Villi, Eyþór Ingi, Húnabandið, Eyjólfur Kristjánsson og Stuðbandið. Um kvöldið verður stórdansleikur með Stuðlabandinu í Félagsheimilinu.

Laugardagurinn hefst með Húnavökugolfmóti Terra á Vatnahverfisvelli og opnu móti í ólympísku Skeet hjá Skotfélaginu Markviss. Hið árlega Blönduhlaup fer fram á laugardaginn og torfæra verður í námuni við Kleifarhorn í umsjón Bílaklúbbs Akureyrar. Fjör verður við Félagsheimilið og þar verður einnig markaðsstemning. Umhverfisverðlaun Blönduósbæjar verða veitt og verðlaun fyrir best skreytta húsið, flottustu og frumlegustu fígúrurnar og fyrir götuna með flestu fígúrurnar. Fjölbreytt skemmtiatriði verða í boði og Sveppi og villi kynna og skemmta. Andlitsmálum og blöðrur verða í boði fyrir börn, Vilko bíllinn mætir á svæðið og teymt verður undir börnum með hesta. Þá verður sýning á bílum hjá 4x4 klúbbnum í Húnavatnssýslum og auðvitað hoppukastalar.

Orgeltónleikar fara fram í Blönduóskirkju þar sem Eyþór Franzson Wechner, organisti kirkjunnar leikur fjölbreytta orgeltónlist á glæsilegt orgel hennar. Boðið er upp á gönguferð í Hrútey með Hrafnhildi Arnardóttur – Shoplifter en hún stendur fyrir sýningunni Boðflenna í Hrútey. Knattspyrnuleikur fer fram á Blönduósvelli þar sem 4. deildar liðin Kormákur/Hvöt og Úlfarnir etja kappi. Sundlaugapartý verður í sundlauginni og Zumba partý í Ósbæ. Kótelettukvöld verður í Eyvindarstofu. Laugardagurinn endar svo á brekkusöng og varðeldi í Fagrahvammi með Halla Guðmunds, Bödda Reynis, Jónsa Í svörtum fötum og Ingó trommara SSSól. Fyrir þá allra hörðustu verður stórdansleikur í Félagsheimilinu með Jónsa og Regínu og hljómsveit.

Á sunnudaginn fer fram gönguferð fjölskyldunnar en gengið verður frá hafnarsvæðinu og þaðan út á Bolabás. Útgáfutónleikar verða haldnir í Blönduóskirkju í tilefni af nýrri plötu Halla Guðmunds og boðið verður upp á jóga með Svövu í Kvenfélagsgarðinum. Alla daga Húnavöku geta gestir heimsótt Hrútey og skoðað útilistaverk Shoplifter, farið í Heimilisiðnaðarsafnið og séð m.a. sérsýningu ársins sem nefnist Textílbókverkasýningin Spor. Minjastofa Kvennaskólans og Vatnsdæla á refli verða líka opin sem og glæsilega sundlaugin á Blönduósi. Fatamarkaður verður við hliðina á Kjörbúðinni þar sem hægt verður að gera góð kaup. Þá verður Flugklúbbur Blönduósbæjar með útsýnisflug, ef veður og aðstæður leyfa.

Hér hefur verið stiklað á stóru í dagskrá Húnavöku sem hægt er að kynna sér nánar hér.