Rafíþróttir hafa verið í mikilli sókn hér á landi undanfarin ár. Í fyrravor var hrundið af stað verkefni sem kallast rafíþróttir í Húnaþingi vestra. Tilgangurinn er að auka úrval afþreyingar fyrir krakka í sveitarfélaginu og skapa framtíðaraðstöðu fyrir rafíþróttir, sem gæti líka nýst í önnur verkefni.

Jóhannes Gunnar Þorsteinsson Ástuson og Aðalsteinn Grétar Guðmundsson höfðu haft verkefnið í bígerð síðan haustið 2019, en þegar Grunnskóli Húnaþings vestra lenti í úrvinnslusóttkví í mars á síðasta ári var ákveðið að búa til vettvang þar sem krakkarnir gætu eytt tíma með vinum sínum í sýndarheimi og jafnvel eignast nýja vini í leiðinni. Sagt er frá þessu á vef Húnaþings vestra.

Þar kemur fram að í vor hófst samstarf við félagsmiðstöðina Óríon og Húnaklúbbinn og í framhaldinu var ákveðið að nefna rafíþróttahluta Húnaklúbbsins Rafhúna. Formaður Húnaklúbbsins, Jessica Aquino, á heiðurinn að því að útvega fjármögnun fyrir verkefnið. Jóhannes og Aðalsteinn hafa séð um val, innkaup og uppsetningu á tölvum en keyptar voru fimm slíkar ásamt aukahlutum. Rafíþróttasamtök Íslands gáfu Húnaklúbbunum svo fimm hágæða leikjastóla sem notaðir voru á heimsmeistaramótinu í League of Legends sem fram fór í Reykjavík í sumarbyrjun.

„Er það von allra sem að verkefninu standa að þessi nýja aðstaða muni nýtast sem flestum í sveitarfélaginu,“ segir á vef Húnaþings vestra.