Blöndulón fór á yfirfall nýlega og náði það hámarki 27. ágúst síðastliðinn þegar rennslið var 105,31 rúmmetrar á sekúndu. Á sama tíma í fyrra var rennslið um yfirfallið 11,55 rúmmetrar. Í dag er það um 68 rúmmetrar á sekúndu. Yfirfallið er staðsett við norðurenda lónsins, suðvestur við Blöndustíflu og er í 478 metra hæð yfir sjávarmálið. Róbert Daníel Jónsson var þar á ferð á laugardaginn og tók meðfylgjandi myndir.

Á vef Landsvirkjunar kemur fram að rennslið er reiknað með svokölluðum rennslislykli út frá vatnshæð lónsins. Fylgst er með rennslinu um yfirfallið í ýmsum tilgangi. „Mikilvægt er að þekkja vel til vatnsbúskapar virkjunarinnar, hvað rennur til hennar, hvað rennur frá henni og hversu mikið vatn er er ekki nýtt til orkuvinnslu og rennur þá um yfirfall. Einnig má nefna að veiðimenn Blöndu hafa mikinn áhuga á að vita hvenær vatn fer á yfirfall, því aðstæður til veiða í ánni breytast töluvert þegar vatn frá yfirfalli rennur í ána,“ segir á vefnum.

Hægt er að skoða rennslið um yfirfall Blöndulóns á línuritinu hér. Hafa ber í huga að nýjustu upplýsingar eru að öllum líkindum óyfirfarin gögn og ber því að taka með þeim fyrirvara.