Kormákur/Hvöt gerði góða ferð á Álftanes í kvöld þegar seinni leikurinn við samnefnt lið fór fram í úrslitakeppni 4. deildar á Íslandsmótinu í knattspyrnu karla. Fyrri leiknum lauk 1-0 á Blönduósvelli og dugði því jafntefli í kvöld til að Kormákur/Hvöt færi áfram í keppninni. Og það varð raunin, leikurinn endaði 1-1 og mætir Kormákur/Hvöt liði Hamars úr Hveragerði í fjögurra liða úrslitum.

Leikurinn var fjörlegur og sótti lið Álftaness fast að marki Kormáks/Hvatar á köflum. Ekkert mark var skorað í fyrri hálfleik en sex gul spjöld litu dagsins ljós, þrjú á hvort lið. Í raun var ekkert mark skorað í venjulegum leiktíma því það var ekki fyrr en á 5. mínútu í uppbótartíma sem Akil Rondel Dexter De Freitas skoraði fyrir Kormák/Hvöt og mínútu seinna jafnaði Álftanes leikinn. Lengra komust liðin ekki og 1-1 jafntefli staðreynd.

Fyrri leikurinn gegn Hamri í fjögurra liða úrslitum fer fram á föstudaginn klukkan 17:30 og seinni leikurinn þriðjudaginn 7. september klukkan 17.