Ferðamála, menningar- og viðskiptaráðherra hefur úthlutað úr Framkvæmdasjóði ferðamannastaða árið 2022. Að þessu sinni er úthlutunin rúmlega 548 milljónir króna en hæsti einstaki styrkurinn er 55 milljónir kr. Framkvæmdasjóðurinn fjármagnar framkvæmdir á ferðamannastöðum og ferðamannaleiðum í eigu eða umsjón sveitarfélaga og einkaaðila.

Í tilkynningu á vef Stjórnarráðsins segir að verkefnin sem hljóti styrk séu að vanda afar fjölbreytt en hverfist öll um öryggi ferðamanna, bætt aðgengi, bætta innviði, náttúruvernd og sjálfbærni. Ráðherra hyggist heimsækja fjölda áfangastaða sem hafa fengið styrki úr sjóðnum á undanförnum árum á kjörtímabilinu. Þar segir einnig að mikill árangur hafi náðst í starfi framkvæmdasjóðsins í að bæta innviði um land allt og auka getu svæðanna til að taka á móti ferðamönnum.

Alls bárust 154 umsóknir og verkefni sem fá styrk eru 54 talsins. Þar á meðal fær Húnavatnshreppur tæplega 51 milljón króna vegna þriggja verkefna; Verkefnið Hvammsfoss fær 7,7 milljón króna styrk til að koma fyrir göngustíg, bifreiðastæði og lýsingu á gönguleið við fossinn. Verkefnið Vatnsdæla fær 12 milljón króna styrk til að halda áfram uppbyggingu sem hefur verið á sögusviði Vatnsdælu, vegna fjölda ferðamanna sem sækja sögusviðið heim hvert ár. Verkefnð Þrístapar – salerni, fær 31 milljón króna í styrk til að koma fyrir salerni við Þrístapa.

Húnaþing vestra fær 3,8 milljónir í styrk vegna verkefnisins Hvammstangi - dýralíf og náttúruskoðun, bætt öryggi og ásýnd. Verkefnið snýst um að gera örugga gönguleið með pollum og köðlum frá viðlegukanti selaskoðunarbáts og áleiðis að Selasetrinu til að tryggja öryggi ferðamanna og bæta upplifun. Einnig um hönnun á dvalarsvæði í fjöruborðinu við Selasetrið til að bæta aðgengi.

Skagaströnd fær 15,2 milljónir í styrk vegna verkefnisins Spákonufellshöfði – gönguleiðir og fuglaskoðun. Styrkurinn er til að bæta aðgengi og vernda fugla- og plöntulíf á Spákonufellshöfða með því að stýra ferðamönnum um ákveðin svæði og hvetja þá til að fara ekki af göngustígum. Verkefnið felur í sér úrbætur á göngustígum, frágangi á bílastæði sem og hönnun og byggingu á fuglaskoðunarhúsi sem vöntun er á.