Fjórir ungir fótboltastrákar úr Hvöt hafa verið boðaðir til að taka þátt í Hæfileikamótun N1 og KSÍ fyrir drengi á Norðurlandi. Strákarnir eru Andri Snær Björnsson, Eyjólfur Örn Þorgilsson, Gunnar Bogi Hilmarsson og Trausti Þór Þorgilsson. Æfingin fer fram á morgun í Boganum á Akureyri. Sagt er frá þessu á facebooksíðu knattspyrnudeildar Hvatar.

Þar kemur fram að Andri Snær er varnarmaður sem gefst aldrei upp, lætur finna fyrir sér á vellinum og er öruggur í öllum sínum aðgerðum. Eyjólfur Örn er stór og stæðilegur varnarmaður sem er öruggur á boltann og frábæran leikskilning. Gunnar Bogi er bráðefnilegur markmaður, hikar ekki einn á móti einum og er góður á milli stanganna. Trausti Þór er eldfljótur sóknarmaður sem ógnar sífellt með hraða sínum og krafti. Ákefð hans skilar oftast marki eða stoðsendingu.

Helstu markmið Hæfileikamótunar N1 og KSÍ er að fjölga leikmönnum sem fylgst er með, fylgjast með yngri leikmönnum en áður og undirbúa þá fyrir hefðbundnar landsliðsæfingar, koma til móts við minni staði á landsbyggðinni og mæta þeirra þörfum, koma til móts við leikmenn stærri félaga á höfuðborgarsvæðinu sem að öllu jöfnu væru ekki valdir á landsliðsæfingar, bæta samskipti við aðildarfélögin og kynna fyrir þeim stefnu KSÍ í landsliðsmálum og undirbúa leikmenn enn betur til þess að mæta á landsliðsæfingar seinna með fræðslu.