Á vef Húnabyggðar er auglýst eftir verkefnastjóra ferðamála í sveitarfélaginu en um tímabundið starf er að ræða. Æskilegt er að viðkomandi geti hafið störf sem fyrst og vinni í sumar og út ágúst að minnsta kosti. Meðal verkefna sem liggja fyrir eru t.d. utanumhald um ferðamannastaði sveitarfélagins, skálar í leigu, opin svæði og fleira, uppbygging ferðamannastaða, en nokkur svæði eru í þróun eins og Þrístapar, Vatnsdæla og gamli bærinn, styrkjaumsóknir, samskipti við verktaka og fleira.

Í auglýsingunni segir: „Sveitarfélagið er með ýmis járn í eldinum hvað varðar uppbyggingu í ferðmálum og starfið felst í að halda utan um þá uppbyggingu og koma áhersluverkefnum þessa árs í framkvæmd. Æskilegt er að viðkomandi hafi einhverja reynslu og/eða menntun sem nýtist í starfi en það er algjör forsenda að brenna fyrir uppbyggingu ferðamála. Tölvukunnátta og færni í notkun samfélagsmiðla er mikilvæg. Viðkomandi þarf að geta starfað mjög sjálfstætt og haldið utan um samskipti við ýmiskonar hagaðila ferðmennsku í Húnabyggð sem eru bæðir opinberir aðilar, einkarekin fyrirtæki og einstaklingar. Ef þú ert jákvæð, skapandi og drífandi persóna þá er þetta skemmtilegt tækifæri til að taka þátt í mjög spennandi uppbyggingu Húnabyggðar í ferðmálum.“

Umsóknir sendist á hunabyggd@hunabyggd.is merkt „Verkefnastjóri ferðmála.” Umsóknarfrestur er til 31. maí 2023.