Á vef Húnabyggðar er biðlað til íbúa, fyrirtækjaeigendur og forsvarsmenn félagasamtaka um að viðra hugmyndir um viðburði sem hægt væri að halda á þjóðhátíðardaginn 17. júní næstkomandi og á bæjarhátíðinni Húnavöku, sem haldin verður 18.-21. júlí. „Ef þið eruð með hugmyndir að viðburði eða viljið halda viðburð á Húnavöku eða 17.júní hátíðarhöldunum í sumar, hvetjum við ykkur til að hafa samband,“ segir á vef sveitarfélagsins.

Einnig vantar aðila og/eða félagasamtök til að sjá um sölu á varningi (blöðrum, fánum, nammisölu) á 17.júní hátíðarhöldunum.

Þau sem hafa áhuga, eru með hugmyndir eða fyrirspurnir skulu hafa samband við Kristínu Ingibjörgu, menningar-, íþrótta- og tómstundafulltrúa Húnabyggðar í síma 455-4700 eða senda tölvupóst á netfangið kristin@hunabyggd.is fyrir 10. maí 2024.