Kormákur Hvöt hóf leik í 2. deild Íslandsmótsins í knattspyrnu karla í dag. Mótherjinn var Selfoss og fór leikurinn fram á Jáverk-vellinum á Selfossi. Jafnræði var með liðunum í fyrri hálfleik og lítið um færi. Staðan í hálfleik 0-0. Selfoss náði að skora eina mark leiksins í seinni hálfleik og var það eiginlega gegn gangi leiksins. Kormákur Hvöt fékk nokkur góð færi og eitt dauðafæri en inn vildi boltinn ekki. Lokatölur 1-0 fyrir Selfoss.

Fótboltasumarið gæti orðið erfitt fyrir Kormák Hvöt, ef marka má spá þjálfara í 2. deildinni. Spá þeirra er Kormákur Hvöt lendi í neðsta sæti og falli úr deildinni í lok sumars. Spá er bara spá og fróðlegt verður að sjá hvernig Húnvetningar pluma sig á stærra sviði í sumar en þeir eiga að venjast.

Næsti leikur fer fram á Sauðárkróksvelli, laugardaginn 11. maí klukkan 16 og er gegn Reyni Sandgerði. Reynir steinlá á heimavelli í dag gegn Ægi, 0-3. Reynir og Kormákur Hvöt spiluðu bæði í 3. deildinni í fyrra og verður athyglisvert að sjá hvernig viðureign þeirra fer næstkomandi laugardag.