Nú eru sveitasjórnarkosninar að ganga í garð. Hér í Húnavatnshreppi á að kjósa samhliða sveitastjórnakosningunum um hvort íbúar  hreppsins vilji sameinast öðrum bæjar eða sveitarfélögum hér í sýslunni. Ég tel að nú verðum við að láta slag standa og kjósa sameiningu. Fyrsta skrefið er að sameinast Blönduósbæ. Það getur ekki gengið svona áfram að pukrast hver í sínu horni með líklega fleiri sveitasjórnarmenn hér í sýslunni heldur en í Reykjavík allri, reka marga skóla með sífækkandi nemendum en alltaf kostar svipað að reka hvern skóla, hvort sem nemendur eru 50 eða nær 200..

Ég eins og nokkrir aðrir hér í hreppnum eigum börn sem enn ganga í grunnskóla. Ég get ekki séð að þeirra hagsmunum sé vel borgið með þessari skólagöngu eins og hún lítur út í dag. Þetta eru  bekkir með 2 til 4 krökkum í, og hvernig í ósköpunum ættlum við að láta börnunum vegna vel í lífinu ef þau geta aldrei á sinni skólagöngu elft  eða lært félagsleg tengsl og félagslega færni. Það er ekki hægt þegar einingarnar eru svona litlar, 2 stelpur í bekk eða bara einn strákur og ein stelpa. Þú hefur ekkert val um hver verður þinn vinur næstu 10 árin. Svo að hinni hliðinni. Það getur ekki verið auðvelt fyrir kennara að hafa námsefni handa kanski 4 bekkjum, sem eru í samkennslu hverju sinni, og hlýtur að bitna á einhver hátt á sumum nemendum.

Ég hef fulla trú á kennurum og starfsmönnum skólans þeir vinna frábært starf og eru góðir í sínu, eins og í öllum skólum þar sem gott starfsfólk er. Hver skóli er ekki betri en þeir sem þar starfa, en nú er bara svo komið að við þurfum að líta framm á við og stækka heildina. Það er mun betra fyrir okkar yngstu þegna að hafa fleiri jafnaldra til að lifa með. Það styrkir þá félagslega, það auðveldar þeim lífið námslega og  skólinn verður ekki verri, heldur hlýtur hann að verða mun markvissari. Svo fyrir okkur hin sem borgum brúsann á endanum þá er þetta auðvitað mun hagkvæmara og öll umsýsla mun einfaldari. Ef við hugsum þetta örlítið lengra þá held ég að við sjáum öll að þetta styrkir bara okkar sýslu. Það blasir við að með því að sameina Húnavallaskóla og Blönduskóla verður til skóli með um 200 nemendum. Hæfileg stærð á bekk er talin 18 – 25 nemendur. Það þarf engan stærðfræðing til að segja okkur hvað þetta verður miklu ódýrara um leið og það verður betri skóli. Þetta getur líka aukið möguleika á framhaldsnámi í sýslunni eftir grunnskóla. Skólahald getur hins vegar verið á báðum stöðum, ef hentugt þykir. Það er jafn langt frá Blönduósi í Húnavallaskóla og frá Húnavöllum niður á ós. .

Við sækjum öll þjónustu á Blönduós og ansi margir vinna þar sína vinnu líka. Þetta er allt svo tengt að ég sé ekki af hverju við getum ekki bara gert þetta að einu sveitarfélagi líka. Sumir horfa framm á við en aðrir ekki. Ég get örugglega selt þessum, sem engar breytingar vilja, gamlan dráttarjálk til bústarfana það er sjálfsagt hægt að finna gamla kolaeldavél og sauðskinnsskó og annað sem tilheyrði fortíðinni, en því miður fyrir þá, þá lifum við í nútíðinni og hugsum nokkur ár framm í tímann.

Ég hef aldrei hitt þann sem getur heldur sagt mér hvað sé svona óskaplega slæmt við það að sameinast öðrum sveitarfélögum. Er það nafnið sem hið nýja sveitarfélag á að heita? Er það að börnin þurfi að umgangast of mörg börn? Er það bara af því bara? Eða er það að þá höfum við ekki okkar eigin sveitarstjórnarmenn úr sveitinni? Hver segir að okkar fólk geti ekki komist í stjórn hins nýja sveitarfélags? Er ekki flottara að vera bæjarfulltrúi í stóru sveitarfélagi en hreppsnefndarmaður, ef það er meginmarkmið að komast í hreppsnefndina?  Nei ég bara spyr eins og heimaskrítinn bóndi úr sveitinni.

Hugsum um hag okkar barna og sveitarfélagsins og kjósum sameiningu.

Með kveðju úr sveitinni

Óli á Sveinsstöðum