Hér, norður á hjara veraldar er lítið og fallegt bæjarfélag með fallegt bæjarstæði. Það er vart hægt að hugsa sér betri stað til að láta þéttbýli blómstra. Þetta er vissulega Blönduós. 

Þjóðvegurinn dælir til okkar ferðamönnum og ekki er nú verra að vera með nokkrar af fengsælustu stangveiðisvæðum á landinu í kastfæri úr hlaðinu.

Að þessu gefnu hefur bæjarfélagið tækifæri til að hér sé blómlegur verslunar-, iðnaðar- og þjónustukjarni fyrir Norðurland vestra.

Blönduósbær hefur ekki náð flugi seinustu ár og hans helsta varnarbarátta er að sporna við fólksfækkun.  Það er eins og þjóðvegurinn taki meira en hann gefur í þessu sveitarfélagi.

Unga fólkið fer flest að heiman í framhaldsskóla og kemur ekki aftur.  Þegar samfélagið eykur þrýsting á menntun landsmanna, fækkar það fólki í bæjarfélögum sem ekki eru undir það búin. Það vantar meiri jákvæðni og meiri kraft á Blönduós.

Hér tæmast atvinnuhúsnæðin hvert á fætur öðru.  Við erum vön því að fólki sem og störfum fækki og nánast hætt að berjast á móti, þurfum að snúa bökum saman og vinna sem heild gegn þessari þróun.

Það þarf kraft til að vinna okkur upp úr doða seinustu ára og við höfum allt sem þarf til að gera samfélag okkar betra.

Ef við stöndum saman um uppbyggingu sveitarfélagsins getum við vaxið hratt.

Smellum merkjum á enskri tungu á ferðaþjónustuhúsnæði bæjarins, svo að ferðamenn haldi ekki að Kvennaskólinn sé yfirgefið sjúkrahús og Laxasetrið fiskvinnsla.  Splæsum svo í eins og tvö skilti sem auglýsa sundlaugina fyrir utan bæjarmörkin beggja vegna til að ungir vegfarendur geti sett pressu á bílstjóra sína áður en þeir ákveða að stoppa ekki á Blönduósi.

Tölum á jákvæðan hátt um sveitarfélagið út á við til að laða að fólk og fyrirtæki.  Gerum aðeins betur.