Það líður að lokum þessa árs sem þýðir einnig að við erum árinu eldri og vonandi reynslunni ríkari. Fyrir tæpu ári síðan ritaði ég áramótakveðju og birti hér á Húna og það kom mér satt best að setja á óvart viðbrögðin við þeirri grein. Allir með tölu voru ánægðir, mjög ánægðir reyndar, enda tilefnið ánægjulegt, en það sem kom mér mjög á óvart var að sumir virtust mjög hissa, og spurðu nánar út í þetta.

Ég veit ekki með ykkur, en ég er bjartsýn á lífið og tilveruna, auðvitað má alltaf ýmislegt betur fara, það er hægt að finna eitthvað að öllu ef vilji er fyrir hendi en það verður jú alltaf að vera einhver áskorun í lífinu, annars verður engin þróun.

En þetta ræðst af okkur sjálfum nr 1-2-3 og engum öðrum en okkur hvernig samfélagið er sem við búum í. Ef við tölum það niður, þá gera allir aðrir það líka svo mikið er víst. Við skulum því tala það upp, alla daga, allan ársins hring. Og það er bara allt í lagi að hljóma eins og rispuð gömul 45 snúninga vínilplata meðan við segjum eitthvað jákvætt.

Ef hins vegar er nauðsynlegt að segja skoðun sína á einhverju sem mætti setja í neikvæða flokkinn, er best að gera það hratt og snöggt, á kjarnyrtri íslensku sem allir skilja.

Ã�rið 2015 getum við litið á árið þar sem allt fór af stað. Hér opnaði frábært kaffihús Ömmukaffi, til hamingju með það, einstaklega fallegt og notalegt að koma þar og gríðarlega mikilvægt fyrir samfélag eins og okkar. Nýir aðilar hafa tekið við félagsheimilinu, til hamingju með það, sem strax eru búin að sína að það er klárlega á uppleið og eru farin að dekra við hið virðulega og skemmtilega hús eins og þörf var á. Brjálað að gera í SAH sem er frábært og ilmurinn þaðan undanfarið hreint alveg dásamlegur ... sviðalykt og  hangikjötsilmur sem fær mann til að hlakka til jólanna ár hvert, og Stígandi í rífandi verkefnum skilst mér með sitt frábæra handbragð eins og eldhúsið mitt ber vitni um.

Húnabúð varð til fyrir alvöru og átti reyndar eins árs afmæli 1. des síðastliðinn, og nú um áramótin renna Bæjarblómið og Húnabúð í eina heild sem vonandi kemur til með að auka líkur á að slík þjónusta haldist í heimabyggð áfram, en enn og aftur, það ræðst af okkur sjálfum og engum öðrum. Rétt er að taka fram að frú Hrafnhildur “fylgdi með” í kaupunum samkv. hentistefnu nýrra eigenda frábært að hafa slíkan reynslubolta í horni sínu.

Margt fleira er örugglega í farvatninu og því örugglega hægt að hlakka til næstu ára og áratuga. Svo margt til að gleðjast yfir. Var einhver að nefna Pollýönnu?

Ojæja, ég ætlaði nú bara að senda ykkur smá  jólakveðju, en hef sennilega verið pólitíkus í fyrra lífi, dett í eilífar málalengingar og útúrdúra sem eru langt frá málefninu.

Kæru Húnvetningar, Skagfirðingar og aðrir landsmenn, við í Húnabúð óskum ykkur gleðilegra jóla um leið og við viljum þakka ykkur innilega fyrir frábær kynni sem og viðskiptin á árinu sem er að líða, og vonumst við til að sjá ykkur hress og kát á komandi ári og árum. 

Jólakveðja
Sigurlaug Gísladóttir
Urðarbraut 18
540 Blönduós

PS: Ætla í lokin að láta hér fylgja uppskrift af súpu sem er svo ljómandi góð. Birti hana á fési mínu um daginn en góð vísa er aldrei of oft kveðin segir einhvers staðar.

 Upphaflega þar sem ég sá þetta í blaði á læknastofu, hét þetta “framsóknargutl” en þar voru bara engar leiðbeiningar  um hvernig væri best að standa að eldamennskunni  fyrir utanflokkslið svo ég setti þær saman til að auðvelda hlutina.  Súpuna skýrði ég Laugardagsglottið breytt og staðfært ƒº

Verði ykkur að góðu.

Laugardagsglottið

2 laukar, skornir smátt ef þú ert í góðu skapi.
8-900 gr nautakjöt frá SAH, skorið í litla bita, það er kreppa,.....tja nema hjá þingmönnum.
2 msk paprikuduft. En þú ræður því auðvitað.
1-2 dós tómatmauk. Þar sem laukurinn fékk þig til að grenja, skaltu skeyta skapi þínu á tómatmaukinu, sem venjulega þarf að mauka meira. Það virkar vel að láta hugann reika til alþingis meðan á þessu stendur.
2-5 stk súputeninga. Þessa gömlu góðu í bréfinu, nema þú sért með gervi neglur.
1-2 tsk púðursykur. Það bætir (við ) útlitið.
3-4 tsk karrý. Svo þú verðir sjóð heit/ur.
6-8 kartöflur, skornar listrænt.
3-4 gulrætur meðalstórar sneiddar að hætti snillings.
2 stk grænar paprikur skornar samkvæmt geðþótta.
2 stk gular eða rauðar paprikur  skornar í blóm eða blúndur (glætan).
Olíu til steikingar og þú notast við þá tegund sem er með flottustu auglýsinguna í sjónvarpinu.
2,5 dl mjólk  beint úr beljunni  (þessari bláu).
1,5 lítra vatn (kranavatn hentar ágætlega).

Nú þegar þú ert tilbúin að hefjast handa þá er byrjað á því að steikja laukinn í olíunni sem þér fannst fallegust, svo skutlar þú kreppubitunum af kjötinu frá SAH út í og einnig papriku duftinu. Þegar þetta hefur allt brúnast vel, skvettir þú vatninu út í og því næst tómatmaukinu og þeirri útrás sem þú fékkst við að gera það að alvöru mauki, síðan er bætt út í karrý, súputenginum, og púðursykri.

Þegar suðan er komin upp(ekki samt upp úr pottinum) látið þá sjóða í sirka 40 mínútur, og þá er loks komið að restinni af listanum, svo sem eins og þessu listilega skorna og framvegis. Og þá látið þið sjóða aftur í 20 mín.

Þá tæknilega séð getur þú farið að borða, en mjög gott er að hafa bara pottinn á langminnsta straum, og hafa hann þar, og þá getur fólk  bjargað sér sjálft hvenær sem er að deginum eða þegar heimilisfólki eða gestum og gangandi hentar að koma inn til snæðings.

Með þessu er sérlega gott að drekka  ............  allt milli himins og jarðar………. en ég mæli þó með kranavatninu helst óeimuðu.

Ef svo ólíklega vildi til að þetta klárast ekki samdægurs, og þú vilt ekki borða sama matinn marga daga í röð, er tilvalið að skvera þessu í hæfilegan skammt handa þér, setja í viðeigandi ílát og dansa léttan ræl að frystinum sem allir eru búnir að fá sér og skella þessu þar í geymslu. Þú getur þá laumast í þetta þegar engin sér til og þarft ekki annað en að hita það í örbylgjunni. Verði þér að góðu.