Austur Húnavatnssýsla er svæði tækifæranna í ferðaþjónustu. Hvert sem litið er má sjá náttúruperlur sem hægt er að búa fallega umgjörð og fá ferðamanninn til að stöðva um stund og njóta þess sem fyrir augum ber. Við búum við þann kost að hafa hringveginn í gegnum svæðið sem gerir það að ákjósanlegu svæði fyrir ferðamanninn og er það okkar að fá hann til að stoppa bílinn, stíga út og njóta. Ef rétt er haldið á spilum þá bjóðum við upp á eitthvað við hæfi flestra.

Náttúruunnandinn

Ef horft er til svæðisins til útivistar þá eru möguleikarnir endalausir og má sjá tækifæri til að byggja upp svæðið svo það verði eftirsóknarvert. Svæðið býður uppá gönguleiðir sem má byggja betur upp, merkja og markaðssetja fyrir útivistarfólk. Möguleikar á gönguleiðum með ám sem renna í fallegum giljum og bjóða upp á mikla upplifun fyrir ferðamanninn eru margir, svo sem Vatnsdalsárgljúfur, Álkugljúfur, Kornsárgil, Giljárgljúfur, Gljúfurá og svo mætti lengi telja. Gönguleiðir í kringum Blönduós, í náttúruperluna Hrútey og á fjöllin okkar Reykjanibbu, Jörundarfell og Refsborg. Merktar hjólaleiðir eru fáar innan sveitarfélagsins og eru miklir möguleikar til að byggja þær upp, samhliða betri gönguleiðum. Einnig má sjá mikla möguleika inn til heiða fyrir göngu- og hjólafólk, þar eru gistimöguleikarnir í gangamannaskálum og fjölbreytt svæði til útivistar í ósnortinni náttúru.

Vatnahverfið við Blönduós er efnilegt útivistarsvæði, náttúruperla sem iðar af lífi og má byggja upp með góðu skipulagi. Vatnahverfið rímar vel við þá uppbyggingu sem hefur átt sér stað í Hrútey síðastliðin ár. Jörðin Enni mun vera lykkjan sem tengir þessi svæði saman og skipulagt verkefni um skógrækt þar mun auka enn við þá upplifun sem hægt verður að bjóða upp á. Þessi verkefni koma sterk inn í umræðuna um heilsueflandi samfélag.

Hestatengd ferðaþjónusta

Innan sveitarfélagsins eru einar bestu reiðleiðir Íslands, með auknu fjármagni í reiðvegagerð og uppbyggingu á reiðleiðum er hægt að draga til sín hestaunnendur. Með betri aðstöðu fram til heiða og skipulögðum reiðleiðum væri hægt að stór auka vægi þessarar greinar innan sveitarfélagsins. Öll umferð inn á svæðið, hvort sem er akandi, gangandi eða ríðandi skilar sér til samfélagsins.

Menningartengd ferðaþjónusta

Gríðarleg gróska hefur verið síðastliðin ár í menningartengdri ferðaþjónustu. Þar eru mörg tækifæri sem hægt er að byggja upp enn frekar og halda áfram með. Menningartengd ferðaþjónusta dansar við sögu svæðisins og nýtingu á þeim auðlindum sem að svæðið hefur uppá að bjóða. Menningartengd ferðaþjónusta dregur að sér breiðan hóp fólks og ber okkur að bjóða upp á fjölþætta afþreyingu til að ná til sem flestra til að lyfta samfélaginu upp. Hér er menningin á hverju horni og við hvern túnfót.

Gistiaðstaða

Innan sveitarfélagsins eru miklir möguleikar til gistiaðstöðu, bæði í þéttbýli og dreifbýli. Ferðamaðurinn í dag leitar eftir ólíkum gistimöguleikum, hann leitar eftir upplifun og umhverfi. Ferðamenn leita eftir nálægð við hinar íslensku sveitir og að tvinna saman gistingu og upplifun í sveit býður upp á mikla möguleika og sterkari stöðu dreifbýlisins. Sömu möguleika má sjá innan þéttbýlis og þurfum við búa til aðlaðandi umgjörð til að laða að aðila sem vilja byggja upp gistiaðstöðu.

Þörf er fyrir verulegt átak í þessum efnum til að byggja upp öflugt ferðaþjónustusvæði. Fólk í leit að afþreyingu, upplifun og umhverfi mun þurfa gistingu, þjónustu og góðan mat og það er mikilvægt fyrir samfélagið að fá innspýtingu í gegnum ferðaþjónustu til aukinnar uppbyggingar. Hagræn áhrif aukinnar ferðaþjónustu gagnast okkur öllum til að byggja upp betra samfélag.

Sveitarstjórnarkosningar eru handan við hornið. Jón Árni Magnússon, bóndi í Steinnesi, skipar 6. sæti á lista Sjálfstæðismanna og óháðra. Samhliða hefðbundnum sauðfjárbúskap og hrossarækt þá rekur Jón Árni ferðaþjónustu í Steinnesi.