Íbúar Húnavatnshrepps og Blönduóss standa á merkum tímamótum.  Kosið er til sveitarstjórnar í sameinuðu sveitarfélagi.  Sjálfstæðismenn og óháðir bjóða fram lista sem er blanda af reynslumiklu forustufólki gömlu sveitarfélaganna og fólki með mikla þekkingu og styrk, sem er tilbúið að þjóna samfélagi sínu á næsta kjörtímabili.

Það er mikilvægt að Guðmundur Haukur og Ragnhildur Haraldsdóttir hafa gefið kost á sér til að leiða starfið áfram.  Þau voru meðal þeirra sem unnu að sameiningunni og mikilvægt að þau hljóti sterkt umboð til að vera í forsvari hins nýja sveitarfélags. Það skiptir máli að slíta ekki þráðinn í þeirri vinnu.  Það hefur verið kraftur undanfarið kjörtímabil.  Það er mikilvægt að sá kraftur og framsýni verði frá fyrsta degi leiðarljós hins nýja sveitarfélags.  

Líklega átta sig ekki allir á stærð og umfangi framkvæmda fámennra sveitarfélaga. Glæsilegt húsnæði grunnskólans í list- og verknámsgreinum er nýjasta stórframkvæmdin.   Oddviti listans, Guðmundur Haukur, hefur sem dæmi sett það í athyglisvert samhengi að framkvæmdir sveitarfélagsins á Blönduósi er að stærðargráðu sambærilegt við að Reykjavíkurborg ætti ein að byggja nýja Landspítalann.    Rétt eins og myndarlega hefur verið staðið að viðhaldi og endurbótum Húnavallaskóla, sem við þingmenn skoðuðum nýlega á ferð með umhverfisráðherra.  Þetta er veruleiki samfélaga á landsbyggðinni og oft lítill skilningur á við hvað er að eiga.

Af fjöldamörgum verkefnum sem sveitarstjórnir gömlu sveitarfélaganna hafa verið setja á oddinn, verður unnið áfram af nýju sveitarfélagi.  Of langt mál er að telja upp, en þeim eru gerð góð skil í öflugri stefnu D lista og óháðra.  Það mun skipta máli að eiga sterkt og gott samband við stjórnvöld og fyrir okkur sem störfum á Alþingi að eiga gott samstarf við öflugt forustufólk í sveitarfélaginu.  Til þess samstarfs hlökkum við og vitum að saman munum við gera samfélaginu gagn.  Við ætlum saman sannarlega að láta muna um okkur.

Mestu máli skiptir að huga að því að samsett sveitar félag er mörg samfélög, þau eiga að sækja kraft sinn í stærðina um leið og þau eiga að og geta varðveitt sérkenni sín.  Þetta er kúnst.

En umfram allt er mikilvægt að sameining og nýtt upphaf byggi á því góða starfi sem sveitarfélögin hafa undirbyggt.  Að skapa aðstæður fyrir öflugt atvinnulíf, mannlíf, menningu og velferð íbúanna.  Á hverjum tíma eru tækifæri.  Það skiptir höfuðmáli að reynsla og þekking leggi grunn að sterku samfélagi.  Við hvetjum íbúa hins nýja sveitarfélags til að veita D lista og óháðra atkvæði sitt í sveitarstjórnarkosningum 14. maí nk.

Þórdís Kolbrún Reykfjörð Gylfadóttir utanríkisráðherra og varaform Sjálfstæðisflokksins

Haraldur Benediktsson þm NV