Öll viljum við hafa jafnt aðgengi að öflugri velferðarþjónustu, óháð efnahag og búsetu. Með því að auka þá þjónustu við samfélagið erum við að gera betur. Að fjárfesta í fólkinu okkar er markmið sem við eigum að stefna að.

Ný lög tóku gildi þann 1.janúar 2022 sem styðja við bætta þjónustu barna. Með breytingunum á að tryggja börnum og aðstandendum þeirra skilvirkari þjónustu þvert á kerfi, tryggja að hagsmunir barna séu ávallt í fyrirrúmi. Þessi lög gilda um alla þjónustu sem fram fer innan skólakerfisins þar að segja frá leikskóla og uppí framhaldsskóla, á frístundaheimilum og félagsmiðstöðvum. Þetta er þýðingar mikið fyrir fjölskyldur langveikra og fatlaðra barna, við þurfum að gera betur í að þjónusta þær fjölskyldur. Það er alltof oft sem að fjölskyldur fá ekki nægilega mikinn stuðning og kerfin tala hreinlega ekki saman. Með farsældarlögunum verður komið í veg fyrir að grá svæði myndist á milli kerfa.

Markmið.

     Lögum þessum er ætlað að stuðla að farsæld barna. Meginmarkmið laganna er að börn og foreldrar sem á þurfa að halda hafi aðgang að samþættri þjónustu við hæfi án hindrana.
     Við framkvæmd laga þessara skulu réttindi barna tryggð í samræmi við stjórnarskrá og alþjóðlegar skuldbindingar sem Ísland hefur undirgengist, einkum samning Sameinuðu þjóðanna um réttindi barnsins.
     Þeir sem bera ábyrgð samkvæmt lögum þessum skulu:

1. Fylgjast með velferð og farsæld barna og foreldra og meta þörf fyrir þjónustu.
2. Bregðast við þörf barna og foreldra fyrir þjónustu á skilvirkan hátt um leið og þörf krefur.
3. Hafa samráð sín á milli með það að markmiði að þjónusta sé samfelld og samþætt í þágu velferðar og farsældar barna og foreldra.

Þjónustu við fötluð og langveik börn, þar með talið nám og tómstundastarf þarf að skipuleggja út frá þörfum einstaklinganna. Ávallt þarf að gæta að því að bæði einstaklingarnir og aðstandendur þeirra geti verið sem virkastir í samfélaginu.

Á leikskólaaldri þroskast einstaklingur hvað mest á lífsleiðinni, í leikskólanum á fyrsta skólastiginu er lagður grunnur að menntun barna sem næsta skólastig byggir ofan á. Í leikskólanum á hagur og velferð barnanna ávallt að vera að leiðarljósi og taka þarf tillit til ólíkra þarfa barnanna. Starfshættir leikskóla verða að einkennast af umburðarlyndi og kærleika. Börnin eru okkar verðmætasti arfur og á góðum grunni er hægt að styðja við skapandi og hamingjusama einstaklinga sem njóta samveru annara barna og fullorðinna. Í leikskólanum eiga börn að finna til öryggis og getað leitað til fullorðinna með allt sem býr þeim í brjósti. Það er á ábyrgð sveitarfélaga að leikskólar séu þannig byggðir að þeir geti sinnt og uppfyllt þarfir fatlaðra sem ófatlaðra barna. Börn sem þurfa sérstaka aðstoð eða með greiningar að mati fagaðila eiga rétt á þjónustu innan leikskólans.

Það er alveg ljóst að leikskólinn á Blönduósi þarfnast breytinga til að standast þessar kröfur og við því þarf að bregðast skjótt við. Með færanlegum skólastofum má bæta örlítið aðstöðuna og rýmka pláss á deildum en nýr leikskóli þarf klárlega að rísa sem fyrst.

Með það að leiðarljósi verðum eftirsótt samfélag með framúrskarandi þjónustu.

“Fjölmargar íslenskar rannsóknir hafa sýnt að þátttaka unglinga í skipulögðu íþróttastarfi dregur úr líkum á að unglingar leiðist út í frávikshegðun. Þeir unglingar sem leggja reglulega stund á íþróttir eða aðra hreyfingu eru síður líklegir til að sýna neikvætt atferli en aðrir jafnaldrar þeirra. Íþróttastarf, líkt og annað skipulagt tómstundastarf í umsjón ábyrgra fagaðila, er þannig af mörgum talið hafa víðtækt forvarnargildi ekki einungis gegn frávikshegðun,  heldur tengist aukin íþróttaþátttaka einnig betri námsárangri, betri líðan, meiri sjálfsvirðingu og jákvæðari líkamsmynd”. Það er nauðsynlegt að gera öllum börnum kleift að stunda það áhugamál sem það hefur og hreinlega skylda okkar sem samfélag að styðja vel við þá uppbyggingu. Mörg sveitarfélög veita ýmis konar tómstundastyrki til fjölskyldna til að auðvelda börnum til 18 ára aldurs aðgang að íþróttum og tómstundum óháð efnahag eða félagslegum aðstæðum. Við búum svo vel að hafa dreifnám fyrir þennan aldursflokk en vissulega þarf að veita þeim meiri og betri þjónustu og efla félagslíf þessa aldurshóps. Með nýrri og frábærri verkgreinastofu í grunnskólanum eru fjölmörg tækifæri á ýmiskonar námskeiða haldi fyrir allan aldur. Auk þess sem fjölbreytt íþróttastarf er í boði en þessi aldurshópur lendir svolítið á milli skips og bryggju og það er okkar skylda að reyna að gera betur fyrir þennan aldurshóp.

Með sameinuðu nýju sveitarfélagi stöndum við frammi fyrir nýjum áskorunum. Við þurfum að haga íþrótta og tómstundastarfi á þann hátt að samfelldum skóladegi verði lokið þegar að skólabílarnir fari heim á daginn. Með því aukum við aðgengi barnanna að skipulögðu íþróttastarfi og allir ættu að geta tekið þátt í einhverju félags eða íþróttaiðkun sem það hefur áhuga á.

Nýjar verk og listgreina stofur voru opnaðar í Blönduskóla á dögunum, þar er komin frábær viðbót til að nemendur fái að finna sína styrkleika og kynnast þessum greinum betur, aðstaðan er frábær og hægt að auka áherslu á vægi skapandi greina á öllum skólastigum, með það í huga að auka vellíðan nemenda og koma til móts við ólíka styrkleika þeirra. Þessi viðbót styrkir kennslu í þessum greinum til muna og býr til fleiri tækifæri fyrir okkur sem samfélag með frábærri aðstöðu.

Hækkandi lífaldur og bætt lífskjör kalla á breytt viðhorf í þjónustu við eldra fólk. Við þurfum að skapa fjölbreyttari þjónustu sem styður við einstaklinga til að búa sem lengst heima hjá sér, eftir því sem það vill og heilsa leyfir. Með því móti getur það haldið sjálfstæði sínu, sjálfræði, reisn og virðingu, meðal annars með fyrirbyggjandi aðgerðum. Eins þurfum við fjölbreyttara félagsstarf fyrir eldriborgara og verðum að reyna að höfða til sem flestra. Það vilja allir hafa hlutverk og það svo sannarlega eykur lífsgæði hvers og eins. Væri góður kostur að hafa félagsmiðstöð sem sinnir bæði börnum og þeim sem eldri eru ? Ég tel það góðan kost, ef möguleiki væri á að útfæra félagsmiðstöð á þann hátt. Hafa starfsmann eða jafnvel starfsmenn sem geta sinnt þeim sem þangað koma með ólíkar þarfir. Auk þess sem skipulögð dagskrá væri líka í boði. Ég hef unnið á hjúkrunarheimili, sjúkrahúsi, heimahjúkrun og dagvistun fyrir aldraða. Og séð hvað það skiptir miklu máli að allir hafi hlutverk og að allir fái þjónustu við hæfi. Dagvistun í okkar nýja sveitafélagi væri frábær viðbót við þjónustu aldraða.

Þegar allt kemur til alls, þá viljum við öll gera betur, við viljum veita framúrskarandi þjónustu við íbúa hins nýja sameinaða sveitarfélags því hér viljum við búa. Við viljum fá unga fólkið okkar heim og veita barnafólki tækifæri á að koma undir sig fótunum í samfélagi sem tekur þeim fagnandi. Hver og einn í okkar samfélagi skiptir máli, og allir eiga að fá þjónustu sem viðkomandi þarf á að halda. Það er mér mikið hjartans mál að sameiningin takist sem best, það er eitt að sameina sveitarfélögin, það er allt gert á pappír, en að sameina samfélögin krefst gagnkvæmrar virðingar og skilnings á ólíkum þörfum. Ég trúi því að með jákvæðni og lausnamiðuðu viðhorfi mun okkur takast vel til.  

Tryggjum framsókn og framfarir !

Setjum X við B þann 14.maí nk.

Elín Ósk G.

6. sæti á lista Framsókn og aðrir framfarasinnar