Nýlegar lagabreytingar í málefnum barna, nýjar samþykktir sameinaðs sveitarfélags og skipulagsbreytingar í kjölfar sameiningar sveitarfélaganna færa okkur, íbúum tækifæri til bættra lífsgæða.

Hingað til hefur félags- og skólaþjónusta verið rekin í byggðasamlagi þvert á sýsluna. Tillaga sameiningarnefndar sveitarfélaganna lagði til að stofnað yrði nýtt velferðarsvið og við Sjálfstæðismenn og óháðir viljum að þjónustan verði flutt heim í hérað. Lagabreytingar um farsæld barna gera þó ráð fyrir því að málefni barnaverndar verði unnin á stærra þjónustusvæði. Fyrrnefnd lagabreyting gerir einnig ráð fyrir skýrari verkaskiptingu á milli félagsþjónustu annars vegar og barnaverndar hins vegar. Með nýju velferðarsviði er nauðsynlegt að móta heildstæða stefnumótun í málaflokkunum.

Með flutningi félags- og skólaþjónustu á velferðarsvið opnast ný tækifæri til eflingar þjónustunnar til handa íbúum. Stjórnsýslan einfaldast sem gerir ákvarðanatöku einfaldari og boðleiðir styttri. Það er þekkt að þegar þjónustan færist nær íbúum eykst skilningur á þjónustuþörf einstaklinga og þjónustan batnar.

Félags- og skólaþjónustan hefur verið rekin með lágmarksmönnun um árabil með óviðunandi vinnuálagi. Erfiðlega hefur gengið að manna liðveislu og flestir sinna því meðfram öðrum störfum. Því þarf að breyta. Starfið þarf að vera þess eðlis að fólk sækist í að hafa það að aðalstarfi að veita liðveislu og ef til vill má samþætta vinnutímann við önnur stuðningsúrræði félagsþjónustu, svo sem heimaþjónustu og innlitsþjónustu.

Efla þarf þjónustu við eldri borgara og formfesta samvinnu og samstarf við HSN svo fólk geti búið lengur heimavið, haldið reisn sinni og hlutverkum. Það er vel þekkt að skortur á þjónustu á heimili veldur því að fólk leggst fyrr inn á stofnun en ella, með tilheyrandi færniskerðingu og tekjutapi. Þá þurfum við einnig að huga vel að húsnæðismálum eldri borgara, Félag eldri borgara hefur lýst því yfir að húsnæði sérstaklega ætlað eldra fólki skorti. Það á líka við um á okkar svæði. Við þurfum að gera átak í fjölgun íbúða fyrir þennan aldurshóp og leita til einkaaðila um framkvæmdina.

Þrátt fyrir stærra sveitarfélag getur nýtt sameinað sveitarfélag eitt og sér ekki staðið að málefnum fatlaðs fólks með langvarandi stuðningsþarfir. Fyrirséð er að Svf. Skagafjörður verður leiðandi í málaflokknum á þessu svæði með samstarfssamningi en sveitarstjórn þarf að beita sér fyrir því og gæta þess að uppbygging eigi sér stað í málaflokknum hér. Formleg virkniúrræði, iðju og búsetukjarna vantar hér á svæðið.

En til að við getum þjónustað allt okkar fólk þurfum við breiðan hóp fagfólks, með ólíka fagþekkingu. Við þurfum einnig að gera okkur grein fyrir því að smæðin gerir það að verkum að þörf fyrir ákveðna fagþekkingu fyllir ekki upp í heil stöðugildi. Mín hugmynd er að sett verði á laggirnar einhvers konar aðstaða fyrir sjálfstætt starfandi sérfræðinga í fjölskylduráðgjöf, sálfræðinga, félagsráðgjafa og aðra sem sinna málefnum fjölskyldunnar á breiðum grunni. Slík aðstaða myndi draga úr álagi á félagsþjónustu og bæta þjónustu við íbúa.

Tækifærin liggja víða, ég bið um þinn stuðning í sveitarstjórnarkosningum n.k. laugardag. Settu X við D, Sjálfstæðismenn og óháðir í sameinuðu sveitarfélagi Húnavatnshrepps og Blönduósbæjar.

Ásdís Ýr Arnardóttir, frambjóðandi í 5. sæti á lista Sjálfstæðismanna og óháðra