Nú líður senn að kosningum, kosningum sem marka tímamót í okkar samfélagi, nú líkur sögu Blönduósbæjar og Húnavatnshrepps sem sjálfstæðra eininga og við tekur vinna við mótun nýs sameinaðs sveitarfélags.

Á stundu sem þessari verður mér hugsað til baka, hvað hefur áunnist, hvernig hefur okkur gengið, hvert stefnum við.

Síðastliðin fjögur ár hafa verið ánægjuleg, við höfum náð að snúa vörn í sókn. M.a. með tilkomu fyrsta stórnotanda á raforku í A-Húnavatnssýslu síðan Blanda var virkjuð, verkefni sem sveitarfélögin aðstoðuðu við að koma á laggirnar, þá hefur komið til ein mesta uppbygging sem átt hefur sér stað síðustu áratugi. Uppbygging íbúðar- og atvinnuhúsnæðis hleypur á þúsundum fermetra en samt sem áður er vöntun, það er vandamál en það er jákvætt vandamál, það vantar að meira sé byggt.

Nú í upphafi árs var stórum áfanga náð með byggingu list- og verkgreinaálmu Blönduskóla, við hlið matsalarins, og þar með er allt nám skólans komið á sama svæðið, þ.e. í skólanum og íþróttamiðstöðinni sem standa hlið við hlið. Aðstaða til verknámskennslu er nú framúrskarandi og uppfyllir nútímakröfur um aðbúnað og ég hef að minnsta kosti ekki ennþá hitt neinn sem ekki er ánægður með framtakið, jafnt nemendur sem kennarar og starfsfólk virðist líka vel í nýju aðstöðunni og fólk hefur jafnvel haft á orði að það öfundi börnin.

En það er óhætt að segja að þegar svona viðsnúningur næst þá eru áskoranirnar út um allt. Byggt var við leikskólann á Blönduósi árin 2006-7 og er það húsnæði því miður löngu orðið of lítið og ekki í takt við tímann hvað varðar aðbúnað nemenda og starfsfólks og mun það því þurfa að verða næsta stóra forgangsmál fyrir samfélagið að leysa þann vanda. Við viljum að sveitarfélagið stækki og eflist því þá eykst yfirleitt úrval þjónustu samhliða. Við stefnum að því að sameina leikskólana eins og grunnskólana og þá þurfum við að bregðast við og við verðum að leita leiða til að sigrast á því verkefni. Búið er að hanna frumdrög að viðbyggingu við leikskólann sem þarf að taka ákvörðun um hvort unnið verður að EÐA horfa til byggingar nýs leikskóla sem uppfyllir þarfir allra notenda, jafnt nemenda sem kennara. Nýbygging er að mínu persónulega mati fýsilegri kostur til lengri tíma litið þar sem horft yrði til aðbúnaðar, aðgengis, hljóðvistar og fleiri þátta EN slík bygging kostar mikla fjármuni. Hvor leiðin sem verður farin er ljóst að ekki er hægt að bíða með aðgerðir og framkvæmdir. Þetta eru dýrir innviðir en þeir verða að vera til staðar ef samfélagið á að geta vaxið og dafnað.

Samstarf núverandi sveitarstjórnar á Blönduósi hefur verið með ágætum og samstaða um þau stóru verkefni sem hafa verið á kjörtímabilinu sem og þær áskoranir sem við höfum staðið frammi fyrir. „Samþykkt með 7 atkvæðum samhljóða" er það sem okkur hefur tekist að setja við flestar afgreiðslur sveitarstjórnar á líðandi kjörtímabili, við höfum ekki alltaf verið sammála, en við höfum rætt okkur niður á sameiginlegar niðurstöður með þá sýn að byggja upp samfélagið okkar. Covid heimsfaraldur hefur verið mörgum sveitarfélögum þungur baggi og komið niður á flestum innviðum okkar samfélags á einhvern hátt. Það var ekki alltaf dans á rósum að standa í stórum framkvæmdum og uppbyggingu á tímum heimsfaraldurs. Það þurfti aðhald í rekstri og framkvæmdum á sama tíma og skorað var á sveitarfélög að halda atvinnulífinu gangandi og nýta skammtímaúrræði um endurgreiðslu vsk af vinnu. Þar tel ég að sveitarstjórn hafi með góðri samvinnu staðið sig vel og verið samstíga um allar ákvarðanir og afgreiðslur málefna, sem dæmi má nefna að fjárhagsáætlanir, ársreikningar og viðaukar hafa alltaf fengið sömu afgreiðslu – samþykkt með 7 atkvæðum samhljóða. Þetta er m.a. ein af ástæðum þess að okkur hefur gengið vel að byggja upp okkar samfélag og eigum innviði sem margir vildu glaðir hafa í sínum samfélögum.

Starfsfólki Blönduósbæjar vil ég þakka vel unnin störf og svo mikið er víst að ekki vantaði áskoranirnar á kjörtímabilinu.

Að lokum vil ég svo óska okkur öllum heilla með sameinað sveitarfélag, það þarf að vanda það sem lengi á að standa.

Guðmundur Haukur Jakobsson 

Forseti sveitarstjórnar Blönduósbæjar og oddviti framboðs Sjálfstæðismanna og óháðra.

Setjum X við D og höldum sókninni áfram.