Samtök sveitarfélaga á Norðurlandi vestra hafa gert samning við Rannsóknasetur Háskóla Íslands á Ströndum um gerð fýsileikakönnunar um aukið samstarf og mögulegar sameiningar safna á Norðurlandi vestra. Um er að ræða verkefni sem hefur vísun í byggðaáætlun 2018-2024 og er fjármagnað af mennta- og menningarmálaráðuneytinu. Markmið verkefnisins er að efla safnastarf í landshlutum.

Gert er ráð fyrir að vinna við verkefnið hefjist á næstu vikum og verði lokið í október 2020, að því er fram kemur á vef SSNV.

Í lok nóvember í fyrra gerði mennta- og menningarmálaráðuneytið samninga við fjögur landshlutsamtök sveitarfélaga, þar á meðal SSNV vegna vinnu við fýsileikakönnunar á samstarfi og sameiningu safna. Samkvæmt samningnum var landshlutasamtökum sveitarfélaga falið að gera fýsileikakönnun um aukið samstarf eða sameiningu safna á sínu svæði í samstarfi og samráði við höfuðsafn og viðurkennt safn með vísan til safnalaga. Árangur af verkefninu verði svo mældur í fjölda safna sem hefja samstarf eða sameinast.