Í hádegisfréttum Ríkisútvarpsins í dag var fjallað um styrki Framkvæmdasjóði ferðamannastaða, sem er í vörslu Ferðamálastofu. Rætt var við Valdimar O. Hermannsson, sveitarstjóra Blönduósbæjar, sem benti á hróplegt ósamræmi við úthlutun styrkjanna. Veittir voru styrkir til 33 verkefna um land allt vegna ársins 2020 og nam heildarfjárhæðin rúmlega 500 milljónum króna. Einungis 34 milljónir runnu til verkefna á Norðurlandi vestra.

Fimm verkefni á Norðurlandi vestra skipta þessum 34 milljónum á milli sín. Á Suðvesturlandi fengu fimm verkefni alls 92 milljónir. Norðurland eystra fékk 340 milljónir til þrettán verkefna. Vesturland 219 milljónir til 16 verkefna og Vestfirðir fá 140 milljónir í sex verkefni. Þá fær Austurland 115 milljónir í sex verkefni. Á Suðurlandi skipta 37 verkefni á milli sín 1,5 milljarði.

Sveitarstjórn Blönduósbæjar hefur í tvígang lýst vonbrigðum með úthlutun sjóðsins. Valdimar segir í viðtali við Ríkisútvarpið að þau séu ósátt, ósamræmið milli landshluta sé mikið. „Landshlutinn er að reyna að byggja upp ferðamannastaði eins og aðrir landshlutar, við erum ekki að ætlast til þess að fá neitt meira en aðrir heldur sé tekið tillit til þess að við fáum svona jafnvel eitthvað til jafns,“ segir hann. Hann setur þann fyrirvara að hann viti ekki heildarfjölda umsókna en hann viti að fjölmörg verkefni hafi ekki fengið úthlutun og efast um að gæði umsóknanna hafi verið verri.

Valdimar sagði einnig að margir hefðu vonast eftir því að fá úthlutun þegar sjóðurinn tilkynnti um 200 milljón króna aukaúthlutun úr sjóðnum en enginn styrkur rann þá heldur til verkefna á Norðurlandi vestra. „Hvort sem skýringin er svona COVID-mótvægi þá breytir það því ekki að samanburður milli landshluta er ekki góður,“ segir hann.

Enginn styrkur rann til Blönduósbæjar í ár. Áður fékk Fólkvangurinn í Hrútey úthlutun, þar hefur aðeins verið lokið við fyrsta áfanga af þremur. Því var vonast eftir framhaldsstyrk. „Það var nú einhver setning um að þetta væri ekki knýjandi verkefni en fyrir tveimur árum var þetta samþykkt verkefni í þremur áföngum og það hefur ekkert breyst síðan þá. Þetta er knýjandi verkefni fyrir okkur,“ segir Valdimar í samtali við Ríkisútvarpið. Mikilvægt sé að byggja upp ferðamannastaði í landshlutanum, þannig að ferðamenn hafi tilefni til að stoppa en ekki bara keyra í gegn.