Á fundi fræðslunefndar Blönduósbæjar nýverið var komið á framfæri þakklæti og hrósi til starfsmanna grunn- og leikskóla fyrir óeigingjarnt starf við erfiðar aðstæður á undanförnum vikum eða frá því að samkomubann var sett á 16. mars síðastliðinn. Í fundargerð segir að það sé aðdáunarvert hvað tekist hafi að halda úti miklu og góðu skólastarfi í sveitarfélaginu á tímum samkomubanns. Þórhalla Guðbjartsdóttir er skólastjóri Blönduskóla og segir hún að frá 17. mars síðastliðnum hafi kennsla farið fram í öllum bekkjum alla virka daga.

„Okkur hefur tekist að hald úti mjög góðu starfi, það hefur ekki dottið úr dagur í skólanum og kennsla verið í boði fyrir alla nemendur skólans alla daga vikunnar frá klukkan 8-12. Mæting hefur einnig verið mjög góð eða í kringum 80% flesta daga, minni fyrst til að byrja með en síðan fjölgaði þegar á leið,“ segir Þórhalla.

Hjá Blönduskóla hefur verið nánast full kennsla í yngstu bekkjunum frá 17. mars en skerðing um sirka tvær kennslustundir á dag í þeim eldri fyrir páskafrí en eftir páska var einni kennslustund bætt við á dag við hjá 9. og 10. bekk. Skerðingin var þó ekki eins mikil og virðist því ekki voru teknar hefðbundnar frímínútur nema í 1. og 2. bekk og öll útvera samþætt við námsgreinar. Þórhalla segir að lögð hafi verið áhersla á markvissa útiveru í öllum bekkjum á hverjum degi og að það virðist hafa gefið góða raun. Skóladagheimilið, sem er venjulega opið fyrir 1.-4. bekk frá klukkan 13-16 var í samkomubanninu opið frá 12-15 fyrir 1. og 2. bekk og til klukkan 16 fyrir börn í forgangshópi þá daga sem þurfti.

„Við búum svo vel að í skólanum eru margir inngangar og nú kom sér einnig vel að hafa skólann í nokkrum byggingum og salerni eru einnig á mörgum stöðum. Einnig fengum við afnot af Dreifnámsaðstöðu FNV fyrir 9. og 10. bekk sem var alveg frábært. Þetta gerði okkur kleift að dreifa bekkjum og því gátum við verið með kennslu í öllum bekkjum á sama tíma. Markmiðið var að skapa aðstæður sem hentuðu bæði skólastarfinu og heimilunum,“ segir Þórhalla og bætir við að það skipti til dæmis máli að allir komi og fari á sama tíma.

Starfsfólki strax skipt upp í teymi
Aðspurð um breytingar á vinnu og verklagi starfsfólk skólans segir Þórhalla að strax hafi starfsfólki verið skipt upp í teymi. Hvert teymi hafi séð um tvo árganga og hafi þeir verið í sitthvorri stofunni. Teymin hafi séð um að flytja námsgögn á sínar stöðvar og komið sé upp kaffi- og vinnuaðstöðu því ekki hafi þau mátt vera að rápa um kaffistofuna og vinnuaðstöðu starfsfólks í tíma og ótíma. Yfirmenn hafi einnig skipt sér á staði og hvert teymi gengið inn um sömu innganga og þeir nemendur sem þeir voru að kenna. Allir fundir hafi farið fram á netinu.

„Hvert teymi sér um alla kennslu, skipulagningu og stundatöflugerð á sínu svæði. Teymin sáu einnig á sama tíma um að skipuleggja heimakennslu fyrir þá nemendur sem voru í sóttkví, sjálfskipaðri eða skipaðri, og sendu áætlanir, námsefni og annað heim, voru með kennslu í gegnum netið og hringdu heim til foreldra og nemenda,“ segir Þórhalla og upplýsir að mikil aukning hafi orðið í tæknivæðingu á þessum tíma. „En við gerum okkur fyllilega grein fyrir því að það er ekki hægt að kenna allt í gegnum tölvur og eitt af því sem er svo mikilvægt að læra eru samskipti og það lærir maður ekki nema að eiga raunveruleg samskipti við aðra.“

Mikil áhersla á þrif og sótthreinsun
Þórhalla segir að mikil áhersla hafi verið á þrif og sótthreinsun og að reynt hafi verið að auðvelda og einfalda alla verkferla til að hafa mannskap í þessi verk og minnka líkur á stressi,  núningi og mistökum. „Þessi dreifing á innkomu og skipting salerna á milli bekkja var einn liður í því og eins lokuðum við mötuneytinu sem annars hefði kallað á sífellda sótthreinsun á milli hópa. Við vorum vel búin af sótthreinsibúnaði fyrir Covid en síðan leituðu húsverðirnir ekki langt yfir skammt og fengu hlífðarbúnað og frábæra sótthreinsiklúta í Líflandi, sem væntanlega eru dagsdaglega notaðir í fjósum,“ segir Þórhalla og nefnir að auki að skólaliðar hafi séð að mestu um þrif eins og sótthreinsun en teymin hafi séð um sótthreinsun á tölvum, Ipödum og snertiflötum á sínum vinnusvæðum. Þá hafi kennarar í Dreifnámsaðstöðu tekið að sér þrif þar að mestu. Allt hafi verið gert til að auka möguleikana á að geta haldið úti skólastarfi þó smit kæmi á Blönduós.

Allir upplýstir reglulega um stöðuna
Skólastjóri Blönduskóla hefur sent tölvupósta á starfsfólk með upplýsingum varðandi skólastarfið oft í viku en einnig til hvatningar og komið hrósi til skila frá foreldrum og skólayfirvöldum. Einnig hefur hann sent upplýsinga- og hvatningarpóst á foreldra í hverri viku. „Það hafa allir, starfsfólk, nemendur og foreldrar, lagt sitt af mörkum til að láta skólastarfið fara vel fram og nemendur hafa verið vinnusamir og jákvæðir,“ segir Þórhalla.

Skólastarf í Blönduskóla í maí
Skólastarfið í Blönduskóla í þessum mánuði verður með svipuðu sniði og undanfarið en þó með nokkrum breytingum. Allir nemendur eiga að mæta á sama tíma og á þeim stöðum, við þá innganga, sem þeir hafa verið að mæta undanfarnar vikur. Nemendur halda sig við sömu umsjónarstofur, innganga og salerni. Nemendur 9. og 10. bekkjar gætu þurft að mæta einhverja daga eftir hádegi vegna námskeiða.

Kennsla fer fram í umsjónarstofum og úti eins og verið hefur og því þarf að hafa viðeigandi fatnað með hverju sinni. Íþróttir verða kenndar úti í öllum bekkjum og íþróttakennarar sjá um þá tíma, en einnig verða aðrir útitímar eins og verið hefur því lögð hefur verið áhersla á að nemendur fari út á hverjum degi. Teymin flétta list- og verkgreinum inn í kennsluna eins og hægt er bæði úti og inni.

Áfram munu starfsmannateymin halda utanum hvern námshóp (tvo árganga) en það er þó möguleiki að færa á milli ef nauðsyn krefur. Íþróttakennarar fara t.d. á milli bekkja en þá aðeins útivið.

Tónlistarskólinn kemur aftur inn í dag, 4. maí og fá kennarar stofu 4 til afnota út í Gamla skóla (nemendur ganga inn um dyr við matsal og strax upp á aðra hæð).

Skóladagheimilið verður aftur í boði fyrir 1.-4. bekk og mötuneytið einnig fyrir 1.-4.

Ekki er gert ráð fyrir sérstökum prófdögum heldur fara próf fram í kennslustundum.

Vordagarnir verða á sínum stað (skipulagning þeirra er hafin) og 10. bekkur er að skipuleggja vorferðina sína. 10. bekkur verður með námsmaraþon 8. maí.

Námshópum verður haldið aðskildum inn í skólanum en þó verða námshópar sem tilheyra hverju teymi, t.d. eins og 3. og 4. bekkur, stundum saman. Eins er í lagi í maí að slaka á og leika við hvern sem er eftir skóla en fer það að sjálfsögðu eftir hverju heimili hvaða reglur eru settar og ber að virða þær.

Engi vorsýning eða útihátíð fer fram í ár og skólaslit verða með öðrum hætti en vanalega en þau verða 29. maí.

„Við í Blönduskóla viljum ganga varlega út í sumarið, halda vinnufrið og auka samskipti smátt og smátt en ekki í einu stökku,“ segir í tölvupósti til foreldra sem sendur var 29. apríl síðastliðinn.