Bíóbíll RIFF verður á Hvammstanga í dag og ekur um bæinn til að kynna sig. Skammstöfunin RIFF stendur fyrir Reykjavik International Film Festival og verður bíllinn á ferðinni um landið dagana 17.-23. september 2020 og er fyrsti áfangastaður Húnaþing vestra. Hægt verður að kíkja inn fyrir og glugga í stuttmyndir sem sýndar verða í bílnum. Bíllinn mun verða staðsettur við Félagsheimilið á Hvammstanga.

Um kvöldið verður bíllinn svo búinn að koma sér fyrir við Hótel Laugarbakka og mun þar standa fyrir bílabíói. Stórmyndinni Dancer in the Dark, eftir Lars von Trier með Björk í aðalhlutverki, verður varpað á norðurvegg hótelsins (gamla íþróttahússins). Verð er 1.900 kr. á hverja bifreið.

Næsti viðkomustaður bílsins er svo á Dalvík á morgun og svo Raufarhöfn á laugardaginn.