Rekstrarhagræði í yfirstjórn og stjórnsýslu sameinaðs sveitarfélags í Austur-Húnavatnssýslu er áætlað 15-25 milljónir króna. Gert er ráð fyrir að rekstrarhagræði af sameiningu Blönduskóla og Húnavallaskóla verði 50 milljónir króna á ári. Áætlað er að árleg framlög Jöfnunarsjóðs sveitarfélaga til svæðisins hækki um rúmar 20 milljónir á ári við sameininguna. Þetta kemur m.a. fram í tillögu samstarfsnefndar um sameiningu sveitarfélaga í Austur-Húnavatnssýslu.

Í tillögunni segir að það svigrúm sem skapast í yfirstjórn og umsýslu verði nýtt til að auka sérhæfingu og ráða í hlutverk sem sé ekki sinnt í dag, svo sem í upplýsingatækni og mannauðsmálum. Því sé ólíklegt að störfum fækki. Einnig kemur fram að reynsla annarra sameinaðra sveitarfélaga sýni að þótt sparnaður verði í rekstri eins málaflokks þá hafi kostnaður hækkað í öðrum flokkum á móti. Í ljósi mikillar samvinnu sveitarfélaganna í Austur-Húnavatnssýslu sé ekki talið líklegt að útgjöld vaxi verulega við sameiningu vegna nýrra verkefna.

Þá kemur fram í tillögunni að gert er ráð fyrir að kostnaður við breytingar og innleiðingu sameinaðs sveitarfélags verði um 80 milljónir króna á fyrsta ári og um 40 milljónir króna árlega næstu fjögur ár. Sérstök framlög úr Jöfnunarsjóði eru ætluð til að standa straum af innleiðingu breytinga.

Sjá kynningarbækling um sameiningartillögu samstarfsnefndarinnar hér.