Frystitogarinn Arnar HU1 sem er í eigu Fisk Seafood á Sauðárkróki uppfyllir ekki skilyrði efnalaga vegna notkunar ósoneyðandi efni í kælikerfi skipsins. Umhverfisstofnun hefur knúið á um að Fisk Seafood geri ráðstafanir til úrbóta og lagði fyrirtækið fram úrbótaáætlun sem stofnunin sættir sig ekki við. Nú hefur Fisk Seafood sagt upp allri áhöfn skipsins vegna úrskurðar Umhverfisstofnunar.

Umhverfisstofnun barst ábending um málið og áframsendi það til Samgöngustofu sem annast eftirlit með búnaði skipa vegna mengunarvarna. Samgöngustofa staðfesti notkun á kælimiðlinum R-22 um borð Arnars HU1 en notkun á endurheimtum R-22 miðli hefur verið bönnuð frá 1. janúar 2015 og notkun nýrra efna enn lengur, samanber reglugerð um efni sem valda rýrnun ósonlagsins, sem innleidd var hér á landi árið 2013.

Fisk Seafood var veittur frestur til 13. apríl síðastliðinn til að senda stofnuninni úrbætur og til að koma sjónarmiðum sínum á framfæri. Fyrirtækið sendi úrbótaáætlun innan tímafrestsins, en stofnunin taldi þær ekki fullnægjandi og veitti því Fisk Seafood áminningu til að knýja á um framkvæmd ráðstöfunar samkvæmt efnalögum með frest til 19. maí síðastliðinn.

Í úrbótaáætluninni kemur fram að Fisk Seafood hefur samið við kælismiðju sem mun annast hönnun og uppsetningu á nýju kerfi þar sem kælimiðillinn R22 verði fjarlægður úr skipinu og eru breytingarnar áætlaðar í nóvember á þessu ár, þar sem núverandi frystikerfi verður fjarlægt og nýtt kerfi sett upp. Umhverfisstofnun telur jákvætt að fyrirtækið ætli að skipta um kælikerfi og fá nýtt en telur þá ráðstöfun ekki nægja þar sem bannað er að nota kælimiðilinn R-22. Stofnunin gerir þá kröfu að fyrirtækið tappi kælimiðlinum R-22 af kælikerfi skipsins og komi honum til förgunar fyrir spilliefni. Verði fyrirtækið ekki við þeirri kröfu megi það eiga von á dagsektum allt að 500.000 krónum fyrir hvern dag þar til úr er bætt.

Nú hefur Fisk Seafood sagt upp allri áhöfninni á Arnari HU1 og er ástæðan umræddur úrskurður Umhverfisstofnunar sem fyrirtækið telur að sé reistur á afar hæpnum forsendum. Uppsagnirnar séu liður í að verja hagsmuni fyrirtækisins og þeirra starfsmanna sem í hlut eiga. Skipið fer nú í slipp og má búast við að áhöfnin verði ráðin aftur þegar búið verður að skipta um kælikerfi.

Hér má sjá úrskurð Umhverfisstofnunar.