Í kynningarbæklingi samstarfsnefndar sveitarfélaga í Austur-Húnavatnssýslu um sameiningartillögu kemur fram að það sé framtíðarsýn Húnvetninga að Austur-Húnavatnssýsla verði umhverfisvænasta samfélag landsins. Stofnun umhverfisakademíu og markviss stefnumótun séu meðal fyrstu aðgerða í þá átt. Stuðningur stjórnvalda við stofnun umhverfisakademíu, atvinnuþróun og samgöngubætur eru forsenda þess að framtíðarsýnin nái fram að ganga.

Hugmyndir eru um stofnun umhverfisakademíu í Húnavallaskóla. Ef sveitarfélögin sameinast mun Húnavallaskóli og Blönduskóli sameinast og skólahald þá væntanlega leggjast af á Húnavöllum í kjölfarið. Í Morgunblaðinu í dag er rætt við Magnús B. Jónsson, fyrrverandi sveitarstjórna á Skagaströnd, en hann átti sæti í starfshópi sem mótaði tillögur um umhverfisakademíu. Segir hann að hugmyndin sé að setja upp grunnbúðir í Húnavallaskóla en einnig verði unnt að vera með verkefnið um afmarkaða þætti annars staðar í héraðinu. Nefnir hann rannsóknarstöð Biopol á Skagaströnd og Textílmiðstöðina á Blönduósi. Þá falli til ýmis rannsóknarverkefni á urðunarstaðnum í Stekkjarvík.

Í Morgunblaðinu í dag kemur fram að starfshópurinn taldi umhverfisakademíu á Húnavöllum bæði gerlega og áhugaverða. Lagði hann til að sveitarstjórnirnar myndu leggja fram samtals 15 milljónir króna sem stofnfé. Blönduósbær og Húnavatnshreppur hafi tekið jákvætt í hugmyndina en sveitarstjórn Blönduósbæjar tengi afstöðu sína við að sameining verði samþykkt. Hvorugt sveitarfélagið tók afstöðu til fjárútláta í bókunum sínum. Magnús tekur fram að þótt hugmyndir heimamanna séu komnar fram eigi verkefnið eftir að þróast frekar í vinnu með sérfróðu fólki um slíka fræðslu.

Sjá nánari umfjöllun í frétt í Morgunblaðinu í dag.