Lögreglan á Norðurlandi vestra hefur tekið í notkun færanlega hraðamyndavél. Með henni er hægt að að taka myndi af öllum þeim sem fara framhjá án þess að þurfa að hafa sérstök afskipti af ökumönnum eins og gert hefur verið hingað til. Þá munu þeir sem brjóta af sér fá send sektarboð líkt og gerist þegar ökumenn eru gripnir með hraðamyndavélum. Sagt er frá þessu á vef Feykis.

Ívar Björn Sandholt Guðmundsson lögregluþjónn og Pétur Björnsson varðstjóri segja að hægt sé að staðsetja myndavélina nánast hvar sem er. „Við viljum líka nota þetta sem forvarnartæki og munum láta vita á facebooksíðu okkar þegar við förum að mæla í þéttbýli í umdæminu. Þá getum við líka notað þetta sem fyrirbyggjandi aðgerð,“ segir Pétur og bætir við að ekki verði látið vita þegar mælt er á þjóðvegi.

Tækið var prófað um síðustu helgi á þjóðveginum við Varmahlíð og voru tæplega 200 ökumenn teknir fyrir of hraðan akstur, þar af 111 á einum klukkutíma.

Sjá nánari umfjöllun á vef Feykis.