Það fer víst ekki fram hjá neinum að í dag er Hrekkjavaka. Á Skagaströnd kallast hún Skaggavaka og klukkan 16 í dag munu börn fara í hús og sníkja nammi. Þeir sem vilja taka þátt geta skreytt eða sett kerti fyrir utan hjá sér til að börnin viti að þau séu velkomin. Klukkan 18-20 verður draugahús í Félagsmiðstöðinni og draugasögur í Spákonuhofi. Í Félagsmiðstöðinni Skjólinu á Blönduósi verður líka draugahús og eru allir íbúar Húnabyggðar boðnir velkomnir að kíkja í heimsókn. Opið verður klukkan 18-19.

"Hrekkjavaka nefnist á enskri tungu Halloween sem er annar ritháttur fyrir Hallowe’en. Hallowe’en er svo stytting á nafninu All Hallows’ Evening eða All Hallows’ Eve sem er kvöldið 31. október, vakan fyrir Allraheilagramessu sem er tileinkuð píslarvottum kirkjunnar. Upphaflega var Allraheilagramessa haldin hátíðleg 1. maí hvers árs, en árið 834 var dagsetning hennar færð yfir á 1. nóvember, fyrst og fremst vegna þess að henni var ætlað að koma í staðinn fyrir ýmsar mikilvægar heiðnar hátíðir sem haldnar voru á sama tíma." Sjá nánar á Vísindavefnum.