Búið er að uppfæra áfangastaðaáætlun fyrir Norðurland 2021-2023 sem gefin var út í byrjun síðasta árs. Áætlunin er unnin af Markaðsstofu Norðurlands í samstarfi við Ferðamálastofu og nær yfir allt Norðurland eða frá Hrútafirði og yfir á Bakkafjörð. Í henni eru dregin saman helstu stefnumál ferðaþjónustunnar á svæðinu og meðal annars tilgreind helstu forgangsverkefni hvers sveitarfélags í landshlutanum.

Áfangaáætlunin var fyrst gefin út 2018 og þá var gerður forgangslisti yfir verkefni sem ráðast þurfti í og tengdust ferðaþjónustu á svæðinu. Sveitarfélögum og ferðamálasamtökum var boðið að senda inn topp fimm lista yfir verkefni sem þau töldu að bæru brýnust á sínu svæði. Í framhaldi var haldinn fundur á hverju svæði, samtals fimm fundir á hverjum stað, þar sem voru valin þrjú verkefni fyrir hvert svæði, samtals 15 verkefni.

Í Húnavatnssýslum, sem skilgreint er sem svæði eitt voru verkefni valin sem tengjast Kálfshamarsvík, Vatnsnesvegi og Vatnsdalshólum. Í Áfangaáætluninni er stöðu hvers verkefnis lýst eins og staðan er í dag:

Kálfshamarsvík
Verið er að endurskoða deiliskipulag fyrir svæðið. Áætlað er að gera aðstöðu fyrir bílastæði og salernishús. Síðan verður farið að skoða gönguleiðir á svæðinu.

Vatnsnesvegur
Komið á samgönguáætlun 2020 – 2034 og er áætlað á þriðja tímabili áætlunarinnar. Mikilvægt er að flýta framkvæmdum umfram þessa áætlun.

Vatnsdalshólar
Fyrsta og öðrum áfanga er lokið, en þeir snerust um að skipta út jarðvegi, leggja göngustíg og byggja upp bílastæði. Auk þess er búið að skipta um jarðveg þar sem upplýsingaskilti verður sett. Þriðji áfangi snýst um að setja upp sýninguna sjálfa þar sem m.a. þarf að helluleggja og setja upp ljósa sýningu.

19% verkefna á Norðurlandi vestra
Árið 2020 var unnið að nýrri forgangsröðun verkefna á Norðurlandi sem eru partur af áfangastaðaáætlun 2021-23. Sömu aðferðafræði var beitt og síðast þegar verkefnum var forgangsraðað, í henni felst að öllum sveitarfélögum og ferðamálafélögum er gefið tækifæri til að senda inn sína topp fimm lista yfir verkefni sem þau vildu að lögð yrði áhersla á árinu 2020. Í febrúar 2020 var send út hvatning um að unnið yrði að listanum í góðri samvinnu við baklandið. Frestur var gefinn til byrjunar júní og voru 52 verkefni send inn. Af 20 sveitarfélögum á Norðurlandi skiluðu 12 inn tillögum. Voru 19% þessara verkefna á Norðurlandi vestra og 81% á Norðurlandi eystra.

Ný verkefni bæst við
Á Norðurlandi vestra skiluðu einungis tvö af fimm sveitarfélög inn lista af verkefnum árið 2020. Í áfangastaðaáætluninni segir að síðan þá hafi þessi ferill að nokkru leyti komist inn í fyrirkomulag sveitarfélaga, eins og vonir stóðu til og að á þessu ári hafi fjögur af fimm sveitarfélögum skilað inn lista. Í áætluninni er svo farið yfir verkefnin.

Í Húnaþingi vestra tengjast þau Vatnsnesi, Borðeyri, hafnarsvæðinu á Hvammstanga, Kolugljúfri og Reykjum.

í Húnabyggð tengjast þau Gullsteini, Fossinum í Fossagili í Vatnsdal, Ólafslundi, Þrándarhlíðarfjalli, Vatnsdælusögu, gamla bænum á Blönduósi, gönguleiðum við Blöndu, Bolaási og hringsjá sem staðsett yrði í göngufjarlægð frá gamla bænum á Blönduósi.

Verkefni Skagastrandar tengjast Spákonufellshöfða, Spákonufelli, Hafnarstíg og Sandlæk.

Lesa má nánar um þessi verkefni í áfangastaðaáætluninni.