Sveitarstjórn Húnabyggðar auglýsir á vef sveitarfélagsins nýtt deiliskipulag fyrir atvinnusvæði sem liggur norðan Norðurlandsvegar, sem er þjóðvegur 1 og liggur í gegnum Blönduós. Skipulagssvæðið er 3,5 hektarar að stærð, er staðsett við Norðurlandsveginn og afmarkast af honum til suðurs, Hólabraut til vesturs, Efstubraut til austurs og Melabraut til norðurs.

Deiliskipulagið er ætlað að skilgreina núverandi lóðir og núverandi og mögulegar viðbótar byggingarheimildir. Í skipulagstillögunni segir að tækifæri séu til staðar innan skipulagssvæðisins til að auka við byggingarheimildir á þegar byggðum lóðum og sé meginmarkmið skipulagsvinnunnar að samræma skilmála á svæðinu, gæta að byggðamynstri og samfellu innan reitsins og bæta ásýnd og frágang lóða innan reitsins þar sem um sé að ræða aðkomu inn í þéttbýlið. Deiliskipulagið er í samræmi við Aðalskipulag Blönduósbæjar 2010 -2030.

Opið hús verður á skrifstofu Húnabyggðar á Hnjúkabyggð 33 miðvikudaginn 7. desember klukkan 10-12.

Frestur til að skila inn ábendingum og athugasemdum rennur út 6. janúar 2023 og skal þeim skilað á netfangið skipulagsfulltrui@hunathing.is eða með bréfpósti stílað á skipulagsfulltrúa Húnabyggðar Hnjúkabyggð 33, 540 Blönduósi.

Skipulagstillöguna má sjá hér