Líkt og undanfarin ár, hefur Byggðastofnun fengið Orkustofnun til að reikna út kostnað á ársgrundvelli, við raforkunotkun og húshitun á sömu fasteigninni, á nokkrum þéttbýlisstöðum og í dreifbýli. Auk staðanna sem miðað var við síðustu ár hafa 22 nýir staðir bæst við, þar á meðal er Skagaströnd, og ná tölur fyrir þá alla aftur til 2014.

Viðmiðunareignin er einbýlishús, 140 m2 að grunnfleti og 350 m3. Almenn raforkunotkun er sú raforka sem er notuð í annað en að hita upp húsnæði, s.s. ljós og heimilistæki, en miðað er við 4.500 kWst í almennri rafmagnsnotkun og 28.400 kWst við húshitun án varmadælu og 14.200 kWst með varmadælu.

Hvað raforku varðar er lægsta mögulega verð fyrir viðmiðunareignina, með flutnings- og dreifingarkostnaði, fæst hjá Veitum: Í Mosfellsbæ, í Reykjavík, Kópavogi, austurhluta Garðabæjar, á Seltjarnarnesi og á Akranesi, um 79 þúsund krónur. Hæsta gjald í þéttbýli er um 92 þúsund hjá Orkubúi Vestfjarða en raforkuverð eru áberandi hærri í dreifbýli, eða um 121 þúsund. Lægsta mögulega verð í dreifbýli 53% hærra en lægsta mögulega verð í þéttbýli.

Þegar kemur að húshitunarkostnaði viðmiðunareignar er munurinn á milli svæða mun meiri en á raforkuverði. Lægsta mögulega verð er hæst 191 þúsund krónur á stöðum þar sem þarf að notast við beina rafhitun, meðal annars á Grundarfirði, á Hólmavík, á Neskaupstað, á Reyðarfirði, í Vík og á Vopnafirði auk dreifbýlis á svæðum RARIK og Orkubús Vestfjarða. Með varmadælu er þó áætlað að hann geti lækkað í um 96 þúsund fyrir viðmiðunareign, eða um 50%. Lægsti húshitunarkostnaðurinn er á Flúðum og Seltjarnarnesi um 66 þúsund og í Brautarholti á Skeiðum um 53 þúsund og á þessum stöðum er því húshitunarkostnaður um þriðjungur af kostnaðinum þar sem hann er hæstur.

Ef horft er til lægsta mögulega heildarorkukostnaðar fyrir viðmiðunareignina þá er hann, líkt og undanfarin ár, hæstur í dreifbýli þar sem ekki er hitaveita 312 þúsund krónur. Heildarkostnaður í þéttbýli er hæstur 284 þúsund á Hólmavík og öðrum þéttbýlisstöðum á Vestfjörðum með beina rafhitun og þar næst 279 þúsund á þéttbýlisstöðum annars staðar á landinu þar sem er rafhitun, þ.m.t. í Grundarfirði, á Neskaupstað, á Reyðarfirði og á Vopnafirði. Lægsti heildarorkukostnaður landsins er á Seltjarnarnesi 145 þúsund en þar næst á Flúðum 155 þúsund og í Mosfellsbæ 160 þúsund.

Norðurland vestra

Á Norðurlandi vestra eru allir þéttbýlisstaðirnir í greiningunni með hitaveitu. Hæsti húshitunarkostnaðurinn er hjá RARIK á Blönduósi og Skagaströnd 162 þúsund krónur og hefur hækkað um 1,8% frá 2014. Á Hvammstanga er Hitaveita Húnaþings vestra en þar er lægsti mögulegi húshitunarkostnaður 110 þúsund og hefur hækkað frá 2014 um 15,8%. Lægsti húshitunarkostnaður á Norðurlandi vestra er hjá Skagafjarðarveitum, í Varmahlíð og á Hofsósi um 90 þúsund og á Sauðárkróki 93 þúsund. Húshitunarkostnaður þar hefur hækkað um 4% síðan 2014.

Á Norðurlandi vestra er lægsti mögulegi heildarorkukostnaður hæstur á Blönduósi og Skagaströnd eða 250 þúsund krónur. Hann er nánast sá sami nú og 2014 en hefur hækkað og lækkað aftur í millitíðinni. Á Hofsósi er orkukostnaður 211 þúsund og hefur hækkað um 3,0% frá 2014. Þó húshitunarkostnaður sé með lægra móti á Hofsósi, líkt og í Varmahlíð, er þorpið skilgreint sem dreifbýli hvað raforku varðar. Varmahlíð er hins vegar skilgreind sem þéttbýli og þar er lægsti heildarorkukostnaður á Norðurlandi vestra 178 þúsund. Á Hvammstanga er heildarorkukostnaður 198 þúsund og hefur hækkað um 6,6% frá 2014. Á Sauðárkróki er næst lægsti heildarorkukostnaður viðmiðunareignar á Norðurlandi vestra 181 þúsund og hefur hækkað um 0,4% síðan 2014.

Sjá skýrslu um samanburð á orkukostnaði heimila árið 2020 hér.