Húnvetningurinn Þóra Margrét Lúthersdóttir býður sig fram í 2.-3. sæti á lista Vinstri grænna í Norðvesturkjördæmi fyrir komandi alþingiskosningar. Hún er elst fjögurra systkina, dóttir hjónanna Lúthers Olgeirssonar og Sigríðar Ragnarsdóttur. Þóra Margrét er uppalin í Forsæludal í Vatnsdal og er með búfræðiprófa frá Hvanneyri. Hún er í sambúð með Einari Árna Sigurðssyni og eiga þau saman fjögur börn á aldrinum 7-11 ára.

Tilkynning frá Þóru Margréti:

Ég er Þóra Margrét og er fædd 1sta febrúar 1982 og uppalin í Forsæludal í Vatnsdal. Sem unglingur og fyrstu árin þar á eftir bjó ég víðsvegar um Ísland meðal annars á Akureyri, Skagafirði, Hornafirði og í Reykjavík og dvaldi í Danmörku (Sönderborg) í tæp 2 ár.

Ég er elst fjögurra systkina, dóttir hjónanna Lúthers Olgeirssonar og Sigríðar Ragnarsdóttur.

Ég er í sambúð með Einari Árna Sigurðssyni og eigum við saman fjögur börn á aldrinum 7-11 ára. Ég lauk stúdentsprófi frá VMA árið 2009, og búfræðiprófi frá Hvanneyri 2012. Ég hef að auki lokið fyrsta ári í B.S í skógfræði frá Hvanneyri.

Við Einar rekum sauðfjárbú með um 600 fjár að Forsæludal en við tókum við búi foreldra minna 2014. Við eigum auk þess nokkur hross og hænur. Ég sé að mestu um búreksturinn en Einar starfar sem yfirvélstjóri hjá Samskip og er fjarverandi frá fjölskyldu og búi annan hvern mánuð.

Ég ætla að leggja spilin á borðið í þessum pistli.

Ég hafði engan áhuga á stjórnmálum eða samfélaginu lengst framan af. Ég hugsaði um margt hér er ég, um mig, til mín. Sú hugsun fleytti mér þangað sem ég stend í dag en núna vil ég gera betur – láta fleiri njóta þeirra krafta sem ég veit að ég bý yfir. Ég vil ljá Norðvesturkjördæmi rödd, styrkja það og uppbyggingu svæðisins. Í NV kjördæmi er mesta framleiðni sauðfjárræktar á Íslandi, sem dæmi, eru 27% innlagðrar ullar hjá Ístex frá þessu svæði og ein stærstu sauðfjárbú landsins eru hér í kjördæminu. Það býr yfir ótalmörgum tækifærum og auðlindum á sviðum landbúnaðar, nýsköpunar og framleiðslu. Við höfum dugandi fólk á sviðum nýsköpunar, ferðaþjónustu, fiskræktar, landbúnaðar, þjónustustarfa og sérfræðiþekkingar.

Til að folk geti nýtt tækifæri sín og þau fái meðbyr, þarf talsmann til innviðauppbygginga. Ég vil vera kjördæmi mínu sá talsmaður sem til þarf til að horft verði til svæðisins þegar kemur að þessum þáttum.

En hver er persónan Þóra, það er oft erfitt að lofa sig eða segja gildi sín. Ég vil samt segja að mín gildi séu: hreinskilni, samkennd og hlustun. Ég segi það sem ég hugsa, ég get sett mig í spor annarra og ég hlusta þó að ég sé ekki endilega sammála skoðuninni. Góð gildi sem veita fólki innsýn í persónuleika.

Ég vil byggja upp mitt samfélag, í samstarfi með þeim sem búa hér. Ég óskaði eftir að fá umsagnir um mig... ég fékk nokkrar. Frá fólki sem ég hef átt lítil samskipti við, samstarfsfólki og vinum.

Ég læt hér þrjár þeirra fylgja með:

Hún Þóra er hjartahrein, virðist vera feiminn í fjarlægð en er félagslind þegar þú ferð og talar við hana. Hún er ekki að trana sér fram en þegar maður talar við hana er mikil viska sem býr þar að baki. Hún er hress, skemmtileg, brosmild og knúsin hennar geta brætt þykkar brynjur. Ég vildi hafa hana í mínu liði ef ég þyrfti að ráðast í erfitt verk.

Myndi lýsa Þóru sem duglegri persónu sem hefur tekið líf sitt nokkuð föstum tökum, í þá veru að efla sjálfa sig um leið fjölskyldu sína með árangri sem er sómi að. Þrátt fyrir að stundum blási móti Þóru og hún hallist mikið eða falli, stendur hún upp aftur og heldur áfram. Sjálfstæði hennar og viðhorf til lífsins, skila henni og manni hennar glöðum og þrekmiklum börnum. Vill vera virkur þáttakandi í samfélaginu sem hún hefur höndlað betur en margur annar.

Dugnaðarforkur, berskjölduð, traust, heiðarleg, klár, ákveðin, hress og skemmtileg.

Ég býð mig fram í 2-3 sæti VG í Norðvesturkjördæmi.