Í morgunútvarpi Rásar 2 í vikunni var fjallað um Vörusmiðjuna á Skagaströnd en þar er starfrækt vottað vinnslurými fyrir smáframleiðendur. Þar geta þeir leigt vottaða aðstöðu þar sem hægt er að þróa og framleiða matvöru og snyrtivöru. Þórhildur M. Jónsdóttir er verkefnastjóri Vörusmiðjunnar og aðstoðar framleiðendur sem koma og nýta sér aðstöðuna. Hún tók á móti Gígju Hólmgeirsdóttur sem kom í heimsókn frá Rás 2.

Starfsemi Vörusmiðjunnar hófst fyrir þremur árum og hefur vaxið mikið síðan. Margir framleiðendur hafa bæst í hópinn og flestir þeirra eru bændur með kjötframleiðslu. Einnig eru framleiddar vörur úr fiskafurðum og grænmeti. Þórhildur sagði virkilega gaman að fylgjast með öllum þeim nýju vörum sem hafa orðið til á staðnum og líka hvað framleiðendum hafi fjölgað.

Hún sagði að átta framleiðendur framleiði í Vörusmiðjunni allt árið og að þeir komi mestmegnis af Norðurlandi vestra. Í upphafi hafi flestir verið úr Skagafirði en svo hafi orðið breyting og fólk bæst í hópinn úr Austur- og Vestur-Húnavatnssýslu.

Þórhildur sagðist einnig skynja aukinn áhuga neytenda á vörum sem framleiddar eru á þennan hátt. „Við höfum orðið vör við að neytendur vilja vöru beint frá býli, vilja vita upprunann og þekkja bóndann.“ Hún sagði jafnframt að starfsemi sem þessi væri gríðarlega mikilvæg fyrir svæðið. „Ég held ég geti sagt að þessir átta framleiðendur sem eru hjá okkur í dag væru ekki í framleiðslu nema af því þetta rými er í boði, því það kostar heilmikið að byggja upp svona vottað vinnslurými,“ sagði Þórhildur í samtali við Rás 2.

Einnig var rætt við Sigrúnu Helgu Indriðadóttur frá Stórhóli í Skagafirði.

Sjá má umfjöllun Ríkisútvarpsins hér.