|
15:01 |
21. ág. 2018 |
Norðurlands Jakinn 2018
Fer fram dagana 23.-25. ágúst
Norðurlands Jakinn er aflraunakeppni sterkustu manna landsins sem fer fram á Norðurlandi og er hún í anda Vestfjarðarvíkingsins. Keppt er í einni grein í bæjarfélögum víðsvegar á Norðurlandi. Aðgangur er ókeypis og er almenningur hvattur til að mæta og sjá sterkustu menn landsins sýna krafta sína. Umsjónarmaður keppninnar er Magnús Ver Magnússon. Keppt er m.a. á Blönduósi og Skagaströnd. |
|
14:08 |
21. ág. 2018 |
Eftirlit með gæsaveiðimönnum
Gæsaveiðitímabilið hófst í gær hefur Lögreglan á Norðurlandi vestra haft sérstakt eftirlit með skotveiðimönnum á Kjalvegi í góðu samstarfi við Lögregluna á Suðurlandi. Ræddi hún við á fjórða tug veiðimanna um reglur um skotveiðar, skoðaði skotvopnaréttindi þeirra, veiðikort og skotvopn. Á Facebook síðu lögreglunnar kemur fram að nánast allir veiðimennirnir hafi verið til fyrirmyndar. |
|
10:50 |
21. ág. 2018 |
Smávirkjanir á Norðurlandi vestra
Lyftistöng fyrir bændur og atvinnulífið?
Samtök sveitarfélaga á Norðurlandi vestra hafa látið vinna frumúttekt á mögulegum smávirkjanakostum á Norðurlandi vestra og nær hún til yfir 80 staða í landshlutanum. Verkefnið var áhersluverkefni Sóknaráætlunar landshluta árið 2017 og verður fram haldið á þessu ári og því næsta. SSNV stendur fyrir kynningu á verkefninu í fundarsal Samstöðu að Þverbraut 1 á Blönduósi, fimmtudaginn 30. ágúst, klukkan 14-16. Allir eru velkomnir. |
|
09:45 |
21. ág. 2018 |
Gríptu boltann
Fundaherferð RML og FL
Framleiðnisjóður landbúnaðarins og Ráðgjafarmiðstöð landbúnaðarins standa í ágúst fyrir fundaherferð með það markmið að hvetja til nýsköpunar í sveitum. Einn slíkur verður í félagsheimilinu Víðihlíð 22. ágúst næstkomandi klukkan 20:00. Fundirnir verða öllum opnir og eru sem flestir hvattir til að mæta.
Aðalfyrirlesari fundanna er Guðmundur Guðmundsson, landsliðsþjálfari í handbolta og flytur hann erindi sem ber nafnið Leiðin til sigurs. |
|
15:43 |
20. ág. 2018 |
Snjólaug varði Íslandsmeistaratitilinn
Snjólaug María Jónsdóttir frá Skotfélaginu Markviss á Blönduósi varði Íslandsmeistaratitil sinn í kvennaflokki á Íslandsmótinu í Skeet sem fram fór um helgina á skotsvæði Skotfélags Reykjavíkur. Snjólaug hampaði einnig Íslandsmeistaratitli í flokkakeppni. Brynjar Þór Guðmundsson frá Markviss hafnaði í öðru sæti í 1. flokki karla á mótinu. |
|
15:32 |
20. ág. 2018 |
Engin úrslitakeppni í ár
Sameiginlegt lið Kormáks og Hvatar í knattspyrnu karla tapaði fyrir ÍH á Ásvöllum á laugardaginn. Tapið þýðir að liðið kemst ekki í úrslitakeppni fjórðudeildar á Íslandsmótinu. Leikurinn endaði 2-1 fyrir heimamenn í ÍH. Kormákur/Hvöt komst yfir í leiknum á 33. mínútu með marki Kristófers Skúla Auðunssonar og stóðu leikar þannig í hálfleik. Í seinni hálfleik skoruðu ÍH menn tvö mörk og gerðu út um leikinn. Seinna markið var á síðustu mínútu leiksins. Jafntefli hefði gefið liðinu séns að ná í úrslitakeppnina. |
|
14:12 |
17. ág. 2018 |
Kjörnir aðalfulltrúar fá bókargjöf frá SSNV
Kjörnir aðalfulltrúar í sveitarstjórnum á Norðurlandi vestra, alls 45, hafa fengið afhenta bókina Sveitarstjórnarréttur eftir Trausta Fannar Valsson. Bókin er gjöf frá Samtökum sveitarfélaga á Norðurlandi vestra. Bókargjöfin var samþykkt á fundi stjórnar SSNV 10. júlí síðastliðinn í kjölfar upplýsinga sem framkvæmdastjóri samtakanna lagði fram yfir nýkjörna aðalmenn í sveitarstjórnir á starfssvæðinu eftir síðustu sveitarstjórnarkosningar. |
|
12:11 |
17. ág. 2018 |
Jójó tónleikar á Skaganum
Flestir Húnvetningar muna eftir hljómsveitinni Jójó frá Skagaströnd sem gerði garðinn frægan fyrir 30 árum síðan. Sveitin kom saman í sumar og spilaði á Skagaströnd í tilefni Sjómannadagsins og í kvöld ætlar hún að spila á Ævintýrahátíðinni Steampunk Iceland sem haldin er á Akranesi um helgina. Í samtali við Húnahornið segir Viggó Magnússon, bassaleikari Jójó, að hjómsveitin ætli að spila tíu af sínum bestu lögum frá árunum 1988-89 og að tónleikarnir fari fram í Dularfullu búðinni á Akranesi klukkan 22:00. |
|
09:59 |
17. ág. 2018 |
Fyrirkomulag gæsaveiða í eignarlöndum Húnaþings vestra
Gæsaveiðitímabilið hefst á mánudaginn og stendur til 15. mars. Húnaþing vestra hefur birt á vef sínum fyrirkomulag gæsaveiða í eignarlöndum sveitarfélagsins. Veiðimönnum með gilt skotvopnaleyfi og veiðikort stendur til boða að kaupa sérstakt veiðileyfi útgefið af Húnaþingi vestra sem veitir þeim einum heimild til gæsaveiða. Um er að ræða leyfi á þrjú svæði og kostar hvert leyfi kr. 9.000 á dag. Fjöldi veiðimanna á veiðisvæði er takmarkaður við fjórar byssur á hvert svæði á dag. |
|
13:38 |
16. ág. 2018 |
20 ára afmæli Húnaþings vestra
Sveitarfélagið Húnaþing vestra fagnar 20 ára afmæli í ár og af því tilefni verður íbúum þess boðið upp á ýmsa sögu- og menningartengda viðburði dagana 24.-26. ágúst. Umsjónaraðili með dagskránni er Menningarfélag Húnaþings vestra og verður áhersla lögð á góðar samverustundir víðsvegar um sveitarfélagið. Harmonikkuball á Laugarbakka, nytjamarkaður, Markaðsdagur á Borðeyri, hestamót í Víðidal, tónleikar á Hvammstanga, brekkustemning í Kirkjuhvammi, varðeldur, söngur og kakó svo sitthvað sé nefnt. |
|
12:11 |
16. ág. 2018 |
Blanda komin á yfirfall
Samkvæmt vikulegum veiðitölum úr 75 aflahæstu laxveiðiám landsins sem birtar eru á vef Landssambands veiðifélaga hefur dregið verulega úr laxveiði í Blöndu. Skýringin er sú að áin er komin á yfirfall. Vel hefur rignt í sumar sem gerir það að verkum að Blöndulón er orðið fullt og seytlar nú fram yfir. Alls hafa 848 laxar veiðst í ánni í sumar en vikuveiðin 9.-15. ágúst var einungis 16 laxar. Á sama tíma í fyrra höfðu veiðst 1.331 laxar í Blöndu og nemur samdrátturinn 36% milli ára. |
|
10:26 |
16. ág. 2018 |
Íslandsmeistaramótið í hrútadómum
Mikið hefur verið um að vera á Sauðfjársetrinu á Ströndum í sumar, margvíslegar uppákomur og viðburðir. Framundan er svo stærsta samkoma ársins, Íslandsmeistaramótið í hrútadómum, sem verður haldið sunnudaginn 19. ágúst og hefst klukkan 14:00 í Sævangi við Steingrímsfjörð.
Ester Sigfúsdóttir framkvæmdarstjóri Sauðfjársetursins segir að undirbúningur fyrir helgina gangi mjög vel. „Það er alltaf góð þátttaka í hrútadómunum, en keppt er bæði í flokki þaulreyndra hrútadómara og líka í flokki óvanra og hræddra hrútaþuklara." |
|
14:06 |
15. ág. 2018 |
Vilko auglýsir eftir starfsfólki
Vilko ehf. á Blönduósi auglýsir eftir starfsfólki í starf sölustjóra og í framleiðslu. Umsóknarfrestur er til og með 26. ágúst næstkomandi. Upplýsingar um störfin veitir Kári Kárason framkvæmdastjóri og er aðeins tekið rafrænt við umsóknum á netfangið sala@vilko.is. Helstu viðfangsefni sölustjóra er sala á vörum í stóreldhús, veitingastaði, verslanir og í matvælaiðnað. Helstu viðfangsefni framleiðslustarfsmanns er framleiðsla matvæla og pökkun, tiltekt pantana og þrif á vinnusal tækjabúnaði. |
|
13:55 |
15. ág. 2018 |
Skólastarf að hefjast í grunnskólum
Skólastarf í grunnskólum Húnavatnssýslna er að fara af stað eftir sumarfrí. Blönduskóli verður settur 22. ágúst klukkan 11 í Blönduóskirkju og eru foreldrar hvattur til að mæta með börnunum sínum. Kennsla hefst svo fimmtudaginn 23. ágúst. Höfðaskóli verður settur í Hólaneskirkju 27. ágúst klukkan 10 og kennsla hefst þriðjudaginn 28. ágúst. Húnavallaskóli verður settur föstudaginn 24. ágúst og kennsla hefst samkvæmt stundarskrá mánudaginn 27. ágúst. |
|
13:25 |
15. ág. 2018 |
Vilja halda áfram viðræðum um sameiningu
Hreppsnefnd Skagabyggðar hefur tilnefnt að nýju fulltrúa í sameiningarnefnd sveitarfélaga í Austur-Húnavatnssýslu. Dagný Rós Úlfarsdóttir og Magnús Björnsson eru áfram í nefndinni en Karen Helga Steinsdóttir kemur ný inn í stað Vignis Sveinssonar fráfarandi oddvita hreppsins. Dagný Rós, oddviti hreppsins segir í fréttum Ríkisútvarpsins í dag að vilji sé til að halda áfram viðræðunum. Jón Gíslason, oddviti Húnavatnshrepps, segir einni í samtali við Ríkisútvarpið í dag að sveitarstjórnin hafi ekki rætt málið formlega en það verði gert á næstu vikum. Hann segir að það liggi nokkurn veginn fyrir að hún vill halda áfram viðræðunum. |
Loka
Prenta
