Stjórn Samtaka sveitarfélaga á Norðurlandi vestra lýsir yfir áhyggjum af þeim kostnaði sem fallið hefur á sveitarfélögin á starfssvæði samtakanna vegna málefna fatlaðs fólks. „Ljóst er að verulega skortir upp á það fjármagn sem þörf er á til málaflokksins,“ segir í fundargerð stjórnar frá 7. desember síðastliðnum. „Hefur það leitt til þess að sveitarfélögin á Norðurlandi vestra hafa á 6 ára tímabili greitt hátt í 800 milljónir með málaflokknum.“ 

Stjórn fagnar því að í stjórnarsáttmála nýrrar ríkisstjórnar Katrínar Jakobsdóttur er kveðið á um endurmat málaflokksins og bindur vonir við að úr brýnni fjárhagsþörf verði bætt. Jafnframt er bent á nauðsyn þess að halli undangenginna ára verði leiðréttur. „Komi ekki til aukið fjármagn frá ríkinu til málaflokksins er hætt við að vaxandi útgjöld ógni fjárhagslegri sjálfbærni margra sveitarfélaga á starfssvæði samtakanna,“ segir í fundargerðinni.

Tengdar fréttir:

Stefnir í mikinn halla á rekstri málefna fatlaðra

Þungar áhyggjur af þróun kostnaðar

Geta ekki tekið þátt í verkefni um málefni fatlaðra að óbreyttu

Hallarekstur á verkefni um málefni fatlaðs fólks verulegt áhyggjuefni