Sextán ný kórónuveirusmit greindust á Norðurlandi vestra í gær og þar af voru sex utan sóttkvíar. Þetta kemur fram í tilkynningu frá aðgerðastjórn almannavarna á svæðinu. Alls eru nú 49 í einangrun á Norðurlandi vestra og 88 í sóttkví. Í gær greindust 1.101 með kórónuveiruna hérlendis og er það svipaður fjöldi og í fyrradag. Nýgengi innanlandsmita síðustu 14 daga á hverja 100.000 íbúa er nú komið yfir 4.000.

Sjá nánar á covid.is.

Höfðaskóli lokaður fram yfir helgi
Á vef Skagastrandar er athygli vakin á því að fimm smit eru á Skagaströnd og 19 íbúar í sóttkví. Brýnt er fyrir íbúum að sýna aðgát, reyna að takmarka samskipti við aðila utan heimilis eins og hægt er og halda áfram að sinna einstalingssóttvörnum. Mikilvægt er að huga að heilsu sinni og halda sig heima ef veikinda verður vart.

Viðbrögð sveitarfélagsins vegna staðfestra smita í samfélaginu:

1. Vegna staðfests smits í Höfðaskóla verða allir nemendur grunnskólans í úrvinnslusóttkví þar til frekari upplýsingar koma frá smitrakningarteyminu. Mikið álag er á rakningarteyminu og því verður skólinn lokaður bæði fimmtudag og föstudag.

Úrvinnslusóttkví: Meðan verið er að vinna að smitrakningu eru hópar nemenda og/eða starfsmanna sett í úrvinnslusóttkví. Í smitrakningu er verið að skoða hverjir hafa mögulega smitast af einhverjum sem er með Covid-19. Í úrvinnslusóttkví gilda sömu reglur og á við um sóttkví. Úrvinnslusóttkví gildir í innan við 48 klst.

2. Vegna útbreiðslu smita verður skrifstofa sveitarfélagsins lokuð frá og með fimmtudeginum 13. janúar þangað til annað verður tilkynnt.

3. Vegna útbreiðslu smita er lokað fyrir heimsóknir á Sæborg.